१६ असार २०८३, मंगलबार
पत्रकार प्रतीक प्रधान नोना कोइराला पत्रकारिता पुरस्कार–२०८० बाट पुरस्कृत भएका छन् ।
नोना कोइरालाको १६औं स्मृति दिवसको अवसरमा आइतवार विराटनगरमा आयोजित समारोहमा कांग्रेस नेता डा. शेखर कोइरालाले प्रधानलाई पुरस्कार प्रदान गरेका हुन् ।
व्यावसायिक पत्रकारिताको विकास र लोकतन्त्रको उन्नयनमा योगदान गरेको भन्दै प्रधानलाई पुरस्कार प्रदान गरिएको हो । मूलधारका अनलाइन सञ्चालकहरूको संस्था डिजिटल मिडिया सोसाइटीका अध्यक्षसमेत रहेका प्रधान बाह्रखरी मिडियाका प्रधानसम्पादक हुन् ।
पुरस्कार वितरण समारोहमा नेता कोइरालाले राजनीतिमा नैतिकता र संस्कार आवश्यक रहेको बताए । पारिवारिक विरासतका रुपमा आफूले त्यो संस्कार सिकेको उनले बताए ।
‘प्रजातन्त्र भनेको चुनावमा जाने, सरकारमा जाने मात्र होइन । नेताहरूलाई मात्र प्रजातन्त्र आयो, अब जनतालाई आउनुपर्छ’, कोइरालाले भने ।
पुरस्कृत पत्रकार प्रधानले आफूले गरेको कामको कदर गरेकोमा धन्यवाद व्यक्त गरे । ‘पुरस्कार पाउनकै निम्ति पत्रकारिता गरिँदैन, कामको कदर स्वरूप पुरस्कृत गरेकामा धन्यवाद’, प्रधानले भने ।
