२८ असार २०८३, आइतबार
काठमाडौं– सर्वोच्च अदालतले नेत्रबिक्रम चन्द (विप्लव) नेतृत्वको नेपाल कम्युनिस्ट पार्टी (नेकपा)का प्रवक्ता खड्ग बहादुर (प्रकाण्ड)लाई रिहा गर्न आदेश दिएको छ ।
नरेन्द्र बहादुर सिंह विश्वकर्माले दायर गरेको बन्दीप्रत्यक्षीकरणको रिटमा सुनुवाइ गर्दै सर्वोच्चका न्यायाधीश चोलेन्द्र शम्शेर जबरा र तेजबहादुर केसीको इजलाशले शुक्रवार प्रकाण्डलाई रिहा गर्न आदेश जारी गरेको हो ।
विभिन्न व्यवसायीबाट अवैध रुपमा चन्दा शंकलन गरेको आरोपमा पक्राउ परेका प्रकाण्डलाई सर्वोच्चकै आदेशअनुसार बिहीवार अदालतमा उपस्थित गराइएको थियो ।
प्रकाण्ड पक्राउ परेपछि नरेन्द्र बहादुर सिंह विश्वकर्माले साउन २७ गते सर्वोच्च अदालतमा बन्दीप्रत्यक्षीकरणको रिट दायर गरेका थिए ।
रिटको पहिलो सुनुवाइ गर्दै साउन २८ गते सर्वोच्चका न्यायाधीश ओम प्रकाश मिश्रको इजलाशले पक्राउको कारणसहित बन्दीलाई अदालतमा उपस्थित गराउन आदेश दिएको थियो ।
साउन २२ गते (मंगलवार) काठमाडौंको चाल्नाखेलबाट पक्राउ परेका प्रकाण्डले विभिन्न व्यवसायीबाट ७ करोड रुपैयाँ बराबर चन्दा संकलन गरेको पाइएको प्रहरीको दावी छ ।
विश्वकर्मासहित ३ जनालाई चन्दा संकलनको रसिदसहित प्रहरीले बुधबार काठमाडौंको दक्षिणकाली नगरपालिका वडा नम्बर १ चाल्नाखेलबाट पक्राउ गरेको थियो । पक्राउ पर्नेमा विश्वकर्माका अलावा कपिलवस्तुको वाणगंगा नगरपालिका– ४ का ५० वर्षीय मनबहादुर श्रेष्ठ र कालिकोटको कालिका गाउँपालिका– ६ का ३३ वर्षीय हरिचन्द्र आचार्य छन् ।
