काठमाडौं, ९ फागुन — दक्षिण चीन सागरमाथि नियन्त्रणका विषयमा चीनसँग विवाद चर्किएपछि अमेरिकी जलसेनाका एक एयरक्राफ्ट क्यारियर स्ट्राइक ग्रुपले गश्ती शुरु गरेको छ ।
बुधवार चीनले अमेरिकालाई दक्षिण चीन सागरमा सम्प्रभुताका विषयमा चेतावनी दिएपछि शनिवार अमेरिकाले त्यहाँ गश्ती टोली उतारेको थियो । शनिवारदेखि नियमित गश्ती शुरु भएको छ ।
गश्ती टोलीसँग अत्याधुनिक हतियार विद्यमान छ ।
यसअघि चीनले दक्षिण चीन सागरमा नौसैनिक अभ्यास गरेको थियो । चीनले विवादित क्षेत्रमा नौसैनिक अभ्यासका क्रममा एयरक्राफ्ट क्यारियर ल्याएर छिमेकी मुलुकहरूलाई चिन्तामा पारेको थियो ।
प्राकृतिक स्रोतसाधनमा समृद्ध दक्षिण चीन सागरका लगभग सबै क्षेत्रमा चीनले दाबी गरेको छ । दक्षिण चीन सागरको रणनीतिक महत्त्वका अलावा व्यापारिक महत्त्व पनि छ । यहीँबाट वर्षैपिच्छे खरबौं रुपैयाँको व्यापार हुन्छ ।
एजेन्सीको सहयोगमा
