काठमाडौं– प्रधानमन्त्री केपी शर्मा ओलीले राष्ट्रको नाममा सम्बोधन गरेका छन् । नयाँ वर्ष २०७६ सालको अवसरमा आइतबार देशबासीको नाममा सम्बोधन गर्दै प्रधानमन्त्री ओलीले गएको एक वर्ष नीतिगत, कानुनी र संरचनागत जग बसाल्न बितेको भन्दै आगामी वर्षमा देशबासीको आकांक्षा पूरा गर्ने दिशामा सरकार थप सक्रिय भएर अघि बढ्ने प्रतिबद्धता जनाए । 
जनताको चाहना विकास र समृद्धि भएको भन्दै ओलीले सरकार जनताको अपेक्षा पूरा गर्ने दिशामा क्रियासिल रहेको र रहिरहने पनि बताए । 

त्यसका लागि आफ्नो आन्तरिक स्रोतबाट मात्रै लगानी सम्भव नभएकाले बाह्य लगानी खोजेको पनि प्रधानमन्त्रीले जानकारी दिए । उनले लगानी जुटाउनकै लागि चैत १५ र १६ गते लगानी सम्मेलन गरिएको भन्दै सम्मेलनबाट केही लगानीको प्रतिवद्धता आएको पनि बताए । 
सरकारको कार्यशैली र विकासबाट कसैले निराशा पोख्न पोख्ने सक्ने भएपनि सरकार क्रमिक रुपमा विकासमा केन्द्रीत भएकाले आशा गर्ने ठाउँ प्रशस्त रहेको बताए । 
उनले यो एक वर्षमा नै सरबारबाट के भयो र ? भन्ने भन्दा पनि प्रश्न गर्ने तरिका फेर्नुपर्नेमा जोड दिए । 

ओलीले भने, ‘यो वर्ष के–के काम भए भनेर सरकारलाई प्रश्न सोधौं ? कति पुल बने, कति सडक पिच भए, कति बाटो बने ?  पूर्व पश्चिम रेलको डिपिआर त तय भयो, लिक बिछ्याउने काम कहिले हुन्छ ? पानी जहाज कहिले सञ्चालन हुन्छ ? हवाइ जहाज कतिवटा छ ? सामाजिक सुरक्षा कोषले नागरिकमा कस्तो प्रभाव पार्यो ?  प्रधानमन्त्री रोजगार कार्यक्रमले जनतालाई कसरी लाभ दिने भयो ? नेपालको पानी जनताको लगानी कार्यक्रमले जनतालाई किन लाभ हुन्छ ?’ उनले यस्तो प्रश्नहरुमा गरिने प्रश्नको आफैं जवाफ बनेर आउने पनि बताए । 
यस्ता  प्रश्न सोध्नेहरुका लागि सरकार तथ्य तंथ्यांकसहित जवाफ दिन तयार रहेको पनि ओलीले बताए । 
 समृद्ध नेपाली सुखी नेपालको सरकारी आकांक्षा जनता र देश नै भएको भ्नद्यै ओलीले समृद्धि सुखको आधार भएको पनि बताए । 
 फागुन ०७४ मा प्रधानमन्त्रीमा निर्वाचित ओलीले गत वर्ष बैशाख १ मा मुगु पुगेर देशबासीको नाममा सम्बोधन गरेका थिए । यसवर्ष भने बालुवाटारबाटै सम्बोधन गरेका हुन् । सम्बोधनका क्रममा उनले देशबासीलाई नयाँ वर्षको शुभकामना पनि दिएका थिए ।