बागमती प्रदेश सरकारले पत्रकारको हकहितका लागि पेन्सन दिने व्यवस्था शुरू गर्न लागेको छ । 

बागमती प्रदेश सरकारको प्रेस रजिस्टारको कार्यालयले ३० वर्ष पत्रकारिता गरेको र ६० वर्ष उमेर पूरा गरेका ज्येष्ठ पत्रकारलाई पेन्सन दिने व्यवस्था शुरू गर्न लागेको हो । 

बागमती प्रदेशका ज्येष्ठ पत्रकारलाई मासिक ३ हजार रुपैयाँका दरले पेन्सन दिने व्यवस्था शुरू गर्न लागेको प्रेस रजिस्टारको कार्यालयले जनाएको छ ।

पेन्सनका लागि सरकारले १५ लाख रुपैयाँ बजेट छुट्याइएको बताइएको छ । 

दुर्घटनामा मृत्यु भएका पत्रकारलाई ५० हजार आर्थिक सहायता दिने कार्यविधिसमेत पारित भएको प्रेस रजिस्टार रेवती सापकोटाले जानकारी दिए । ‘दुर्घटनामा परेर घाइते भएका पत्रकारलाई ३० हजार रुपैयाँ दिने र क्यान्सर तथा मिर्गौला रोगबाट पीडित पत्रकारलाई ७५ हजार रुपैयाँसम्म सहयोग गर्ने योजना सरकारले अगाडि सारेको छ,’ उनले भने, ‘सुत्केरी पत्रकारलाई प्रोत्साहनस्वरुप ३० हजार रुपैयाँका दरले ४ वटा फेलोसिप दिने योजना पनि प्रदेश सरकारको छ ।’

प्रेस रजिस्टारको कार्यालयबाट हालसम्म करीब १०० पत्रकारले परिचयपत्र समेत प्राप्त गरेको बताइएको छ ।

बागमती प्रदेशका आन्तरिक मामिला तथा कानूनमन्त्री शालिकराम जम्मकट्टेलले प्रदेश सरकारले पत्रकारको हकहितका लागि कानून निर्माणका साथै विभिन्न कार्यक्रम ल्याएको जानकारी दिए ।

प्रदेश सरकारले पत्रकार कल्याणकरी कोषको स्थापना गर्ने तयारी गरेको उल्लेख गर्दै उनले आफू श्रमजीवी पत्रकारका पक्षमा उभिएको बताए ।