१५ असार २०८३, सोमबार
इराकको राजधानी बग्दादमा रहेको ग्रीन जोनमा सोमवार एकाबिहानै दुईवटा रकेट प्रहार गरिएको छ । तीमध्ये एक रकेट अमेरिकी दूतावास नजिक खसेको छ ।
घटनामा कोही पनि हताहत नभएको खबर छ । इराकमा अक्टोबरपछि अमेरिकी अड्डाहरूमा भएको यो २०औं आक्रमण हो ।
समाचारमा आएअनुसार, रकेट उच्च सुरक्षा दिइएको क्षेत्रमा खसाइएको हो । त्यहाँ सरकारी भवन र अनेकौं देशका दूतावास छन् ।
आक्रमणको जिम्मेवारी कसैले पनि लिएको छैन । तर इरान समर्थित समूह हशद अल–शाबीलाई यसका लागि अमेरिकाले दोषी ठहर्याउने गरेको छ ।
अमेरिकाले जनवरी ३ मा बग्दाद विमानस्थलमा ड्रोन आक्रमण गरेर इरानी सैन्य कमान्डर कासिम सुलेमानीको हत्या गरेको थियो । त्यसको प्रतिशोधस्वरूप इरानले ७ र ८ जनवरीमा बग्दाद स्थित अमेरिकी दूतावासमा आक्रमण गरेको थियो ।
