चीनको दक्षिणमा रहेको ग्वाङ्शी प्रान्तको नान्निङ शहरमा दुई वर्षकी एक बालिका पाँचौं तल्लाका झ्यालबाहिरको रेलिङमा झुण्डिएको खतरनाक भिडियो सार्वजनिक भएको छ । 

ती बालिकाका पिता काममा व्यस्त रहेको र आमा औषधि किन्न गएको बेलामा घटना भएको बताइएको छ । 

प्रत्यक्षदर्शीहरूका अनुसार, बालिका सुतेर उठ्दा कसैलाई देखिनन् र आमालाई खोज्दै झ्याल बाहिर निस्किन् । घटना आइतवार भएको हो । 

उनी रेलिङबाट खसेपछि छिमेकीहरूले देखेका थिए । उनको टाउको बाल्कोनीको रेलिङमा अड्किएको थियो । 

भिडियोमा बालिकाले आफूलाई मुक्त गर्न प्रयास गरेको र गोडा फालेको देखिन्छ । उनी त्यति उचाइँबाट खस्ने सम्भावनाले हेर्ने मानिसको मुटु कपाउँछ । 

छिमेकीहरूले गुहार गुहार भनेको पनि सुनिन्छ । एकजना स्थानीय बालिकाको परिवारलाई बोलाएको तर कसैले पनि नसुनेको बताए । 

उनी र अर्का छिमेकीले अगाडिको ढोका लात हानेर भत्काएका थिए । 

उनीहरू बालिका नजिक पुग्दा उनको टाउको रेलिङमा अड्किएको थियो र उनी खस्नै लागेकी थिइन् । पछि अर्को एकजना आएर उनलाई हातमा उठाएर लग्यो । 

बालिकाको उद्धार गर्न १० मिनेट जति लागेको प्रत्यक्षदर्शीहरूले बताए । छोरीको उद्धार भइसक्दा आमा औषधि पसलबाट फर्केकी थिइन् । 

उनले घटनाका कारण भएको तनावका लागि छिमेकीहरूसँग माफी मागिन् र छोरीको जीवन बचाएकोमा धन्यवाद पनि दिइन् ।