महामारी सिर्जना गर्दै फैलिएको कोरोना भाइरस (कोभिड– १९) ले विश्व समुदायलाई सन्त्रस्त बनाइरहेका बेला कोरोना संक्रमणबाट बच्नका लागि दक्षिण एसियाली राष्ट्रहरूले साझा संकल्प गरेका छन् ।

भारतीय प्रधानमन्त्री नरेन्द्र मोदीको पहलमा आइतवार सार्क राष्ट्रका राष्ट्र प्रमुख तथा सरकार प्रमुखबीच भएको भिडियो वार्ताका क्रममा सबैले कोरोनाविरुद्ध एकजुट हुने संकल्प गरे ।

भिडियो वार्ताका क्रममा भारतीय प्रधानमन्त्री नरेन्द्र मोदीले कोरोनाविरुद्ध लड्नका लागि आपतकालीन कोष स्थापनाको प्रस्ताव गर्दै १० मिलियन अमेरिकी सहयोगको घोषणा गरे ।

अन्य राष्ट्रका राष्ट्र प्रमुख तथा सरकार प्रमुखले पनि कोरोनाविरुद्ध एकजुट भएर लड्ने संकल्प गरे ।

अस्पतालबाट डिस्चार्ज भएको ३ दिनमै प्रधानमन्त्री केपी शर्मा ओली भिडियो कन्फ्रेन्समा सहभागी भएर कोरोनाविरुद्धको लडाईंमा नेपालले पनि पहल गरेको प्रमाणित गर्ने प्रयास गरे ।

कोरोनाको बहानामा सार्कको संयन्त्र अनौपचारिक रूपमा ब्युँतिएको छ । भारत र पाकिस्तानबीचको तनावका कारण सार्कको १९औं सम्मेलन हुन सकिरहेको छैन । 

सार्क सम्मेलन हुन नसकिरहेको समयमा कोरोना नियन्त्रणका लागि भएपनि भिडियो वार्तामार्फत संवादहीनताको अन्त्य भएको छ । परन्तु मोदीको पहलमा भएको भिडियो वार्तामा पाकिस्तानका प्रधानमन्त्री इमरान खान आएनन्, उनले स्वास्थ्य राज्यमन्त्रीलाई पठाए, मोदीले उनलाई विज्ञको संज्ञा दिए । 

यसअघि सार्कको विकल्पमा बिमस्टेकलाई क्षेत्रीय संगठनका रूपमा अगाडि बढाउन खोजेका मोदीले विपतका बेला सार्क सम्झेका छन् । विपतका बेला छिमेकीको महत्त्व कति महत्त्वपूर्ण हुँदो रहेछ भन्ने मोदीले बुझेको हुनुपर्छ ।

विपतको सामना गर्न सार्कको विकल्प बिमस्टेक हुन सक्दैन भन्ने फेरि एकपटक प्रमाणित भएको छ । 

जे सुकै भएपनि विश्वव्यापी महामारीको अवस्थामा सार्क राष्ट्रका राष्ट्र प्रमुख तथा सरकार प्रमुखबीच भिडियो वार्ताको पहल गरेर मोदीले प्रशंसनीय काम गरेका छन् ।

आगोको फिलिंगो जस्तै फैलिरहेको कोरोना नियन्त्रणका लागि सार्क जस्ता क्षेत्रीय संगठनको सहकार्य जरुरी छ ।

कुनै न कुनै बहानामा ब्युँतिएको सार्कको संयन्त्रलाई जीवन्त बनाउन कोरोनाको संक्रमण नियन्त्रणलगत्तै रोकिएको सार्क सम्मेलन आयोजना गर्न अध्यक्ष राष्ट्रको हैसियतले नेपालले पहल गर्न जरुरी छ । 

भारत–पाकिस्तान विवादका बीच सार्क सम्मेलनको पहलकदमी लिन सकेमा क्षेत्रीयस्तरमा र विश्वमै पनि नेपालको सामर्थ्य बढ्नेछ ।