१७ असार २०८३, बुधबार
मौकाको फाइदा उठाई यात्रुबाट बढी भाडा लिएर टिकट बेच्ने २० जनालाई प्रहरीले आइतवार कारवाही गरेको छ ।
महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक भीमप्रसाद ढकालले यात्रु बनेर जाँदा बढी भाडा लिएको पाइएपछि आइतवार उनीहरूलाई कारवाही गरिएको बताए । ३ दिनमा ४६ जनालाई यसरी कारवाही गरिसकिएको छ ।
यसअघि शनिवार १७ जनालाई र शुक्रवार ९ जनालाई कारवाही गरिएको थियो । ट्राफिक प्रहरीको हटलाईन १०३ मा आएको गुनासोका आधारमा प्रहरी यात्रु बनेर जाँदा यसरी बढी भाडा लिएको पाइएको हो ।
उनीहरूलाई नयाँ बसपार्क, कोटेश्वर, बल्खु, चाबहिल र गौशालाबाट पक्राउ गरिएको छ । उनीहरूले एउटै टिकट २ जनालाई बेच्ने गरेको समेत पाइएकोे छ ।
कतिपयलाई बढी भाडा नतिरे नलैजाने गरेको पाइएकाले पक्राउ गरिएको प्रहरीले जनाएको छ । प्रहरीले आफैं यात्रु बनेर निगरानी गर्ने, हिँड्न लागेको गाडीका यात्रुसँग जानकारी लिने र यात्रु बस्ने लाममा बसी टिकट मागेर श्रव्यदृष्य रेकर्ड गरी कानूनको दायरामा ल्याउने गरेको छ ।
