रूपन्देहीको तिलोत्तमा योगिकुटीस्थित नेपाल विद्यतु प्राधिकरणको सभ स्टेशनभित्र १५ वटा अजिंगरका बच्चा भेटिएका छन् । सर्प उद्धारकर्ता नविन पौडेल एकै ठाउँमा यति धेरै अजिंगर भेटिएको सम्भवतः पहिलो पटक भएको बताए । 

‘सभ स्टेशनबाट अजिंगर देखियो भनेर उद्धार गर्न बोलाउनुभयो’ पौडेलले भने, ‘शुरूमा एउटा उद्धार गरेर फर्किएँ । लगतै फेरि अर्को पनि देखियो भन्ने खबर आयो । त्यहाँ पुगेर हेर्दा फेरि अर्को पनि थपियो । त्यहीँ ठाउँमा बाँकी १२ वटासहित १५ वटा अजिंगर उद्धार गरेँ ।’ 
ती सबै विद्युत सप्लाई हुने ठाउँमा थिए । तर, उद्धार गरेर जिल्ला वन कार्यालयमा बुझाउने पौडेलको भनाइ छ ।  

पौडेलले १५ दिनअघि सो क्षेत्रबाट ठूलो अजिंगर समातेर उद्धार गरेका थिए । गर्मी बढेसँगै तराई/मधेशमा सर्पको बिगबिगी हुन्छ । 

एक वर्षअघि  तिलोत्तमा–५ प्रेमनगर एक घरभित्र २३ वटा विषालु गोमन सर्प भेटिएका थिए । वर्षायाम शुरू भएसँगै सर्पको टोकाइबाट अकालमा धेरैको ज्यान जाने गरेको छ ।  

विगतमा वन जंगल रहेका ठाउँ घडेरीमा परिणत भएर घर बनेपछि सर्पको बासस्थान मासिँदै गएकाले सर्प बासस्थान खोज्दै घर–घर आउन थालेको सर्प उद्धारकर्ता नविन बताउँछन् ।