०४ साउन २०८३, सोमबार
चीनमा एक महिला ज्वरो आएको भए पनि कोरोनाभाइरस क्वारेन्टाइनबाट बच्नका लागि बसबाट हाम्फालेर भागेकी छन् । उनलाई अधिकारीहरूले समातेका छन् ।
ती महिला चिनियाँ नागरिक हुन् र उनी अध्ययनका लागि जर्मनी गएकी थिइन् । त्यहाँ महाव्याधि बढ्ने डर भएपछि उनी घर फर्केकी थिइन् ।
सामाजिक सञ्जालमा आएको भिडियोमा ती महिला बसको झ्यालबाट हाम्फालेको देखिन्छ । बसले विमानस्थलबाट यात्रुहरूलाई आईसोलेसन केन्द्रतिर लगिरहेको थियो । हाम्फाल्ने बित्तिकै उनलाई हाज्मात वस्त्र लगाएका स्वास्थ्य अधिकारीहरूले समातेका थिए ।
चीनमा कोरोनाभाइरस घटेपछि अनि युरोपमा चाहिँ बढेपछि विदेश पढ्न गएका चिनियाँ विद्यार्थीहरू घर फर्किन थालेका छन् ।
यसरी ठूलो संख्यामा बाहिरबाट मानिसहरू आउन थालेपछि देशमा संक्रमणको दोस्रो लहर आउन सक्ने भनी चिनियाँ सरकारी सञ्चारमाध्यमले चेतावनी दिएको छ ।
ती महिला विद्यार्थीको शारीरिक तापक्रम उच्च रहेको पाइएको थियो । उनी जर्मनीको फ्र्यांकफर्टबाट चिनियाँ शहर चिङ्दाओ आएकी थिइन् ।
अन्य यात्रुहरूका साथ मिनीबसमा बसी पनि क्वारेन्टाइन केन्द्रतर्फ जानका लागि कुरिरहेकी थिइन् ।
तर घर जानको हतारोले उनी भाग्न खोजेको मिडियामा आएको छ । पछि उनको कोरोनाभाइरस परीक्षण गर्दा नेगेटिभ पाइयो र उनलाई अनिवार्य आइसोलेसनमा राखियो ।
