०४ साउन २०८३, सोमबार
विश्वव्यापी महामारीको रूप धारण गरेको कोरोनाभाइरस (कोभिड– १९) को आशंकामा नेपालमा १ हजार १ सय ४५ जनाको स्वास्थ्य परीक्षण गरिएको छ ।
परीक्षण गरिएका मध्ये ५ जनामा पोजेटिभ रिपोर्ट आएको स्वास्थ्य मन्त्रालयले जनाएको छ । बिहीवारसम्म गरिएका परीक्षणमा १ हजार १ सय ४० जनामा भने संक्रमण नदेखिएको मन्त्रालयले जनाएको छ ।
कोरोना संक्रमण पुष्टि भएकामध्ये एक जनालाई निको भइसकेको छ भने ४ जनालाई आइसोलेसनमा राखिएको मन्त्रालयले वेवसाइटमा राखेको विवरणमा उल्लेख छ ।
सरकारले कोरोना संक्रणको आशंका लागेका बिरामीको स्वास्थ्य परीक्षणको दायरा फराकिलो बनाएको जनाएको छ ।
गत डिसेम्बरको अन्तिममा चीनको वुहानबाट शुरू भएको कोरोनाका कारण बिहीवारसम्ममा विश्वभरमा ४७ हजार २ सय ४९ जनाको मृत्यु भइसकेको छ ।
९ लाख ३६ हजार १ सय ७० जनामा संक्रमण देखिएको छ भने १ लाख ९४ हजार ५ सय ७८ जनालाई निको भएको छ ।
अमेरिकामा सबभन्दा धेरै २ लाख १५ हजार ३ सय जनामा संक्रमण देखिएको छ भने ५ हजार १ सय १० जनाको मृत्यु भएको छ । अमेरिका पछि दोस्रोमा इटाली, तेस्रोमा स्पेनमा संक्रममित देखिएका छन ।
