२५ जेठ २०८३, सोमबार
अस्ट्रेलियाका वैज्ञानिकहरू कोरोनाभाइरस निको पार्ने दुईवटा सम्भावित खोपको परीक्षण गरिरहेका छन् ।
विश्व स्वास्थ्य संगठनका अनुसार, अक्सफोर्ड विश्वविद्यालय र अमेरिकी कम्पनी इनोभियो फर्मास्युटिकल्सले बनाएका खोप जनावरमाथि सफल परीक्षण गरिसकेका छन् ।
खोप मानिसहरूमाथि परीक्षण गरेर सफल भएको पाइएमा अस्ट्रेलियाको साइन्स एजेन्सीले त्यसको थप मूल्यांकन गर्नेछ ।
अहिले संसारभरि कोरोनाभाइरसका खोप विकसित गर्नका लागि काम चलिरहेको छ । तर अस्ट्रेलियाको कमनवेल्थ साइन्टिफिक यान्ड इन्डस्ट्रियल रिसर्च अर्गनाइजेसनका अनुसार, यो परीक्षण जनावरहरूमा परीक्षण गरिसकिएको प्रिक्लिनिक ट्रायल हुनेछ ।
संसारभरिबाट सहयोग पाइएकाले यस चरणसम्म आफूहरू तीव्र गतिमा आइपुगेको शोधकर्ताहरूको भनाइ छ ।
संसारभरि अहिले २० वटा खोपको परीक्षण चलिरहेको छ ।
वैज्ञानिकहरूका अनुसार, जनावरमाथि गरिने परीक्षणको परिणाम जुन महिनाको शुरूआतमा आउनेछन् ।
परिणाम सही आए भने खोपलाई क्लिनिकल परीक्षणका लागि पठाइनेछ । त्यसपछि त्यसलाई तीव्र गतिमा बजारमा ल्याइनेछ । तर विशेषज्ञहरूले यसमा हतार गर्न नहुने र कम्तीमा डेढ वर्ष यसका लागि छुट्ट्याउनुपर्ने चेतावनी दिएका छन् ।
