ज्यानमारा महाव्याधि बन्नुअघि नै कोरोनाभाइरस मानव शरीरमा वर्षौंदेखि रहेको हुन सक्ने विज्ञहरूले दाबी गरेका छन् । 

संसार नै अहिले यस भाइरसलाई नियन्त्रणमा लिन संघर्षरत छ । यसले ६९ हजार ४७४ जनाको ज्यान लिइसकेको छ । 

चीनको वुहानमा वन्यजन्तु बेच्ने एब बजारमा चमेरोबाट मानिसमा पहिलोपटक भाइरस सरेको भन्ने षड्यन्त्र सिद्धान्त व्यापक चलेको छ । 

तर अग्रणी वैज्ञानिकहरूले त्यस सिद्धान्तमाथि शंका व्यक्त गरेका छन् । भाइरस मानिसमा महिनौं वा वर्षौंअघि प्रवेश गरेको हुन सक्ने र शरीरमा अनुकूलन हुँदै जाँदा त्यो थप खतरनाक बनेको उनीहरूको भनाइ छ । 

‘मानवहरूमा यो भाइरस केही समयदेखि नै छ जस्तो लाग्छ,’ सरुवा रोग विशेषज्ञ इयन लिपकिनले सीएउनलाई बताए । उनी अमेरिकामा रहेको कोलम्बिया मेलम्यान स्कूल अफ पब्लिक हेल्थमा आबद्ध छन् । 

‘कति लामो समयदेखि थियो ? हामीले ठ्याक्कै भन्न सक्दैनौं । त्यो महिनौंदेखि वा वर्षौंदेखि रहेको हुनसक्छ,’ उनले बताए । 

नेचर मेडिसिन म्यागजिनमा हालै छापिएको एक अध्ययन निष्कर्षले पनि मानिसले थाहा नपाइकन भाइरसले निकै अघिदेखि संक्रमण गरेको हुन सक्ने बताएको छ । 

भाइरसले आफूलाई अनुकूलन गरेर थप संक्रामक बनेको र कालान्तरमा ज्यानमारा बनेको सिद्धान्त हो । 

‘केही महिनाअघि यो विस्फोट भएर भयावह रूप लिएको मात्र हो । यसअघि पनि यो हलुका विस्फोट भएको हसन सक्छ, हामीले पत्ता लगाउन नसकेको मात्र हो,’ उक्त अध्ययनका अध्येता प्राध्यापक रोबर्ट गेरीलृ बताए । उनी टुलेन युनिभर्सिटी स्कूल अफ मेडिसनका प्राध्यापक हुन् ।