अमेरिकाको न्युयोर्कमा बस्ने लाउरा लेविंगरका पति जोलाई कोरोनाभाइरस लागेर अस्पताल भर्ना गरेपछि उनले दिनदिनै प्रेमपत्र लेखेर लन्चबक्समा राखेको लेविंगरले बताएकी छन् । 

ती प्रेमपत्रमा पतिले आफ्नो जीवनमा लाउराको कति महत्त्व छ भनी लेखेको र भोलिपल्ट वा आउँदो सप्ताहान्तका लागि बनाएको योजना सुनाएको लाउरा बताउँछिन् ।

‘उनी मेरो असाध्यै ख्याल राख्थे, मलाई कफी पिलाउँथे र सबै तरिकाले सहयोग गर्थे,’ लाउराले बताइन् । 

४२ वर्षीय जोको १० दिनअघि कोरोनाभाइरसले ज्यान लियो । अमेरिकामा रहेका अन्य परिवार जस्तै लाउराले पनि पतिलाई विद्युतीय माध्यमबाट अलबिदा भन्नुपरेको थियो । 

अहिले घरैमा बस्ने, सामाजिक दूरी कायम राख्ने र आइसोलेसनमा बस्ने गरिरहँदा लाउरा आफ्ना पतिलाई खुबै मिस गर्छिन् । 

‘अहिले पनि घरमा हुँदा कसैलाई देख्दिनँ अनि उनी काममा गएका छन् कि जस्तो लाग्छ,’ उनले भनिन् । 

जो न्युयोर्कको लंग आइल्यान्डमा रहेको क्याथोलिक हाईस्कूलमा काम गर्थे । उनी उपप्रधानाध्यापक थिए र बास्केटबल टीमका प्रशिक्षक पनि थिए । 

जोलाई कुनै रोग थिएन र कोरोनाको हलुका लक्षण मात्र देखिएको थियो । तर पछि उनको ज्वरो चर्कियो र उनलाई सास फेर्न समस्या हुन थाल्यो । 

उनलाई अस्पताल लगिँदा कोरोना भएको पाइयो । 

पछि उपचार गर्दै जाँदा उनी नबाँच्ने संकेत पाएपछि लाउराले पतिसँग फेसटाइम नामक यापमार्फत भिडियो संवाद गरिन् । 

उनको नाडी बन्द हुन लागेपछि लाउराले पतिका लागि विवाह गीत बजाइन् । 

‘मैले हाम्रो विवाहमा गाइएको गीत बजाएँ । त्यसपछि सबै अन्त्य भयो,’ लाउराले भनिन् । 

लाउराका एक छोरा र दुई छोरी छन् । 

उनले सामाजिक दूरी कायम राख्नु र घरैमा बस्नुको महत्त्व बताइन् । 

‘मानिसहरू हेल्चेक्य्राइँ गरिरहेका छन् । आफूलाई केही हुँदैन जस्तो ठानिरहेका छन् । तर तपाईं आफ्नो घरमा बस्ने बाहेक अन्य कोही मानिसको पनि नजिक नपर्नुस् । तपाईंलाई त्यसले दुःखी र एक्लो अनुभव गराए पनि तपाईं घरका सदस्य बाहेक अन्यसँग कदापि बस्नुहुँदैन,’ उनले भनिन् ।