०७ असार २०८३, आइतबार
स्पेनका प्रधानमन्त्री पेड्रो सान्चेजले देशमा लगाइएको लकडाउनलाई क्रमशः घटाउँदै लाने प्रक्रिया छिट्टै शुरू गर्ने बिहीवार बताएका छन् । उनले देशको संसद्लाई संकटकाल अप्रिल २६ सम्म बढाउने आफ्नो प्रस्तावलाई अनुमति दिन पनि अनुरोध गरेका छन् ।
‘हामीहरू चरममा पुगेका छौं र अब नियन्त्रणहरू खुकुलो बनाउँदै लग्नुपर्छ,’ सान्चेजले लगभग रित्तो संसद्लाई सम्बोधन गर्दै भने ।
तर जनजीवन सामान्य हुन अझै निकै समय लाग्ने उनले बताए । सामान्य गतिविधिहरू पुनः सुचारु गर्ने काम चरणबद्ध रूपमा मात्र हुने उनको भनाइ छ ।
युरोपले यस संकटको क्षणमा मुन्टो फर्काउन नहुने उनले बताए । संकटको सामना गर्नका लागि युरोपेलीहरू एक हुनुपर्ने उनको भनाइ छ । ‘भाइरसविरुद्ध एक्यबद्ध नभइएमा युरोपेली संघ खतरामा पर्न सक्छ,’ उनले भने ।
विपक्षी सांसदहरूलाई उनले देशलाई एक किसिमको सामान्य स्थितिमा फर्काउनका लागि एउटा योजनामा काम गरिरहेको उनले सन्देश दिए । तर आफूहरू कस्तो सामान्य अवस्थामा फर्किने हो भन्ने केही थाहा हुन नसकेको उनको भनाइ छ ।
