२५ जेठ २०८३, सोमबार
भारतको उत्तर प्रदेशमा रहेको महोबा जिल्लामा कोरोनाभाइरस महामारीबाट सुरक्षाका लागि चिकित्सकहरूले अनौठो उपाय निकालेका छन् ।
बिरामीलाई नछोइकन चिकित्सकहरूले उनीहरूको स्याम्पल लिन थालेका छन् । यसले गर्दा कोरोना संक्रमणको आशंका गरिएका बिरामीसँगको सामाजिक दूरीमा चिकित्सकहरू पूर्ण सुरक्षित रहनेछन् ।
चिकित्सकहरूले एलुमिनियमको एउटा क्याबिन तयार पारेका छन् जसमा शीशा लगाएर त्यसमा हात छिराउने दुईवटा प्वाल बनाइएको छ । त्यस प्वालमा लामा दुईवटा प्लास्टिकका पञ्जा राखिएका छन् ।
क्याबिनभित्र बसेर चिकित्सकहरूले प्लास्टिकका पञ्जा हातमा छिराएर रोगीहरूको चेकअप गर्ने गरेका छन् । आएको मानिस कोरोना संक्रमित रहेछ भने पनि चिकित्सकहरूलाई संक्रमणको खतरा कम हुन्छ ।
चिकित्सकहरूले यसलाई एयर टाइट क्याबिन फर स्याम्पल कलेक्सन नाम दिएका छन् ।
डा आरपी मिश्राले बताए, ‘यस क्याबिनभित्र चिकित्सकहरू बस्दा बिरामीहरूले खोक्दा वा हाच्छ्युँ गर्दा भाइरस बाहिरै रोकिन्छ । क्याबिनमा हावा भित्र नछिर्ने भएकाले संक्रमणको खतरा रहँदैन ।’
