०५ साउन २०८३, मंगलबार
धेरै देशहरू कोरोनाभाइरस महाव्याधि रोक्नका लागि संघर्ष गरिरहेको बेलामा न्युजील्यान्डले त्यसभन्दा पनि बढी महत्त्वाकांक्षी लक्ष्य लिएको छ । ऊ कोरोनाभाइरसलाई निर्मूल पार्न चाहन्छ ।
न्युजील्यान्डले यो उपलब्धि हासिल गर्न सक्ने विश्वास विज्ञहरूले लिएका छन् ।
अकल्यान्ड विश्वविद्यालयकी खोप विशेषज्ञ हेलेन पेटूसिस–ह्यारिसले भनिन्, ‘भाइरससँग महाशक्ति छैन । संक्रमण रोक्नेबित्तिकै यो हराइहाल्छ ।’
न्युजील्यान्डको भौगोलिक अवस्थाले पनि उसलाई सजिलो बनाएको छ । न्युजील्यान्ड आँधी आउने समुद्रहरूले घेरिएको छ अनि उसको दक्षिणतिर अन्टार्कटिका छ । भूभागको अनुपातमा जनसंख्या कम भएकाले शहरहरूमा पनि भीडभाड छैन ।
अनि प्रधानमन्त्री जासिन्दा आर्डर्नले बोल्ड कदमहरू चाल्दै मार्च महिनाको अन्त्यतिरबाट देशमा कडा लकडाउन लगाएकी छन् । त्यतिखेर जम्मा १०० जनालाई भाइरस संक्रमण भएको पुष्टि भएको थियो ।
न्युजील्यान्डमा व्यापक संक्रमण फैलिएको छैन र नयाँ केसहरू पनि घटिरहेका छन् । जम्मा १३ जनाको मृत्यु भएको छ र प्रधानमन्त्री आर्डर्नलाई प्रत्येक मृतकको बारेमा ब्रीफिङ गरिएको छ ।
‘अन्य देशले हासिल गर्न नसकेको उपलब्धि हामीसामु अवसरका रूपमा आएको छ, त्यो हो भाइरस निर्मूलीकरण । तर पचास लाखजनाको टोलीले यसलाई समर्थन गरिरहनुपर्छ,’ आर्डर्नले पत्रकारहरूलाई बताइन् ।
आर्डर्नले सोमवार देशमा अझै अर्को हप्तासम्म लकडाउन कायम रहने बताइन् अनि अर्थतन्त्र पुनः सुचारु गर्न कामकाजको स्थानमा केही खुकुलो बनाउने जानकारी पनि दिइन् । अन्य सामाजिक नियन्त्रणहरू चाहिँ कायमै रहनेछन् ।
उनले भाइरस निर्मूल पार्ने भन्दैमा भविष्यमा नयाँ केसहरू नै देखिने छैनन् भन्न नखोजेको तर केसहरू देखिए भने तिनलाई तत्कालै रोकिहाल्ने बताइन् ।
