१० असार २०८३, बुधबार
वैज्ञानिकहरूले सूर्य पनि लकडाउनमा गएको र अहिले सोलर मिनिममको अवधि चलिरहेको बताएका छन् ।
यसको अर्थ हुन्छ, सूर्यको सतहमा गतिविधि नाटकीय रूपमा घटेको छ र यसको चुम्बकीय क्षेत्र कमजोर बनेको छ । त्यसले गर्दा सूर्यले चट्याङ पार्ने कस्मिक रेहरू पठाइरहेको छ ।
यस्तो स्थिति रहिरहेमा पृथ्वीको तापक्रम निकै घट्ने सम्भावना रहन्छ ।
बेलायतको मौसम विभाग र रोयल एस्ट्रोनोमिकल सोसायटीले मानिसहरूलाई यो सामान्य प्राकृतिक घटना भएको र तर्सिनुनपर्ने भनिरहेका छन् । सूर्यको गतिविधि चक्रमा प्रत्येक ११ वर्षमा यस्तो घटना हुने गरेको छ ।
तर १७औं र १८औं शताब्दीमा सोलर मिनिमम आउँदा युरोपमा तापक्रम अत्यन्तै घटेर बेलायतको टेम्स नदी जमेको थियो, अन्नबाली मरेका थिए र आकाशमा चट्याङहरू परिरहन्थे । सन् १८१६ मा त जुलाई महिनामा समेत हिउँ परेको थियो ।
सूर्य चार अर्ब ५० करोड वर्ष पुरानो हो र पृथ्वीभन्दा १० लाख गुणा ठूलो छ । सम्पूर्ण प्राणीलाई बाँच्नका लागि सूर्य आवश्यक हुन्छ ।
यसको गतिविधिमा अलिकति मात्र पनि परिवर्तन हुँदा असाधारण परिवर्तनहरू देखिन थाल्छन् ।
सोलर मिनिमम हुँदा चट्याङ पर्ने, रंगीन झिल्का देखिने र पृथ्वीमा बाधाअवरोध आउने हुन्छ ।
