सरकारका नीति तथा कार्यक्रममाथि सांसदहरूले उठाएका प्रश्नको प्रधानमन्त्री केपी शर्मा ओलीले जवाफ दिएपछि मंगलवार सरकारका नीति तथा कार्यक्रम पारित गर्ने तयारी थालिएको छ ।

मध्याह्न १२ बजे बस्ने प्रतिनिधि सभा बैठकमा प्रधानमन्त्री ओलीले सांसद्ले उठाएका प्रश्नको जवाफ दिने कार्यसूची छ । 

प्रधानमन्त्रीले जवाफ दिएपछि सभामुख अग्नि सापकोटाले नीति तथा कार्यक्रमलाई निर्णयार्थ पेश गर्ने कार्यसूची छ । राष्ट्रिय सभाबाट पनि मंगलवार नै सरकारका नीति तथा कार्यक्रम पारित गर्ने तयारी छ ।

यसअघि शुक्रवार संघीय संसद्का दुवै सदन (प्रतिनिधि सभा र राष्टिय सभा)को संयुक्त बैठकमा राष्ट्रपति विद्यादेवी भण्डारीले आर्थिक वर्ष २०७७/०७८ का लागि सरकारका नीति तथा कार्यक्रम प्रस्तुत गरेकी थिइन् ।

सरकारका नीति तथा कार्यक्रम पारित भएपछि सरकारले जेठ १५ गते आर्थिक वर्ष २०७७/०७८ को लागि संसद्मा बजेट ल्याउने छ ।