निजी क्षेत्रको टिप्पणी : बजेटमा सबै चिज समेट्न खोजिएको छ, तर स्पष्ट छैन

ईश्वर अर्याल
ईश्वर अर्याल

पत्रकार अर्याल लोकान्तरका लागि राजनीति, समसामयिक घटनाक्रम र वैदेशिक रोजगारीमा रिपोर्टिङ गर्छन् ।

सरकारले आर्थिक वर्ष २०७७/७८ का लागि ल्याएको बजेटमा निजी क्षेत्रका उद्यमी व्यवसायीहरूले थप स्पष्टता खोजेका छन् ।

अर्थमन्त्री युवराज खतिवडाले बिहीवार प्रतिनिधि सभामा बजेट पेश गरेका थिए ।


Advertisement

शेखर गोल्छा 

लोकान्तरसँग कुरा गर्दै उद्यमी तथा व्यवसायी शेखर गोल्छाले बजेट सकारात्मक भए पनि थप स्पष्ट हुनुपर्ने बताए । 


Advertisement

‘केही कुरा स्पष्ट छ, केही स्पष्ट छैन,’ गोल्छाले लोकान्तरसँग भने, ‘बजेट कन्जरभेटिभ लाग्यो । बजेटमा जोखिम बहन गर्नुपर्ने कुनै कुरा उल्लेख छैन ।’

गोल्छाले निजी क्षेत्रको अपेक्षाबमोजिम केही कुराहरू सम्बोधन गर्न खोजिएपनि थप स्पष्टता माग गरेका छन् । 

‘हामीले अपेक्षा गरेको हिसाबले हेर्ने हो भने विद्युत डिमाण्ड चार्ज, अनि महसूलमा छूट भनिएको छ, त्यो स्पष्ट भएन । उद्योगहरूमा २ तहको सहायता खोजेका थियौं, केहीमा करेक्सन छ तर केहीमा छैन । डिजेलमा भ्याट फिर्ता हुने कुरा थियो त्यो पनि भएन ।’

उनले थपे – होटेल र ट्राभलमा २० प्रतिशत कर छूट भनेको छ, त्यो चाहिँ राम्रो हो । साना उद्यमीहरूलाई कर छूट भनेका थियौं, ७५ देखि २५ प्रतिशतसम्म छूटको कुरा आयो । तर यो अनुसूचीमा होला, भाषण सुनेर मात्र स्पष्ट भएन ।

गोल्छाले १ खर्बको पुन:कर्जाको सहुलियत राम्रो भएको बताए । समग्रमा उनले स्पष्ट ढंगले आउनुपर्ने बजेटमा केही अस्पष्टता देखिएको बताए । 

पवन गोल्यान 

अर्का उद्यमी तथा व्यवसायी पवन गोल्यानले बजेट भाषणमा राम्रो सुनिएको तर कार्यान्वयनमा आफूले चुनौती देखिएको बताए । 

‘कृषि क्षेत्रलाई बढावा दिन मैले राखेको भिजन लगभग सबै आएको छ,’ गोल्यानले भने, ‘उत्पादन, भण्डारण र बजारसम्मको पहुँचका विषय समेटिएका छन् । वन पैदावार उपयोग गर्ने कुरा पनि राम्रो छ, अर्बौंको काठ आयात हुन्थ्यो । त्यो रोकिने वातावरण बनेको छ ।’

उनले मौलिक उत्पादनको प्रदर्शनी गरिने कुरा पनि स्वागतयोग्य रहेको बताए । 

‘उद्योगहरूलाई ५ प्रतिशत ब्याजमा लोन दिने कुरा पनि राम्रै हो,’ उनले भने, ‘पर्यटन उकास्न ५० अर्ब घोषणा हुनु र ५ प्रतिशत ब्याजमा जोन दिनेकुरा पनि राम्रै हो ।’

यो बजेट कार्यान्वयन हुन सक्ने हो भने एकदम राम्रो बजेट रहेको उनले बताए । 

अर्नराज सिलवाल 

व्यवसायी अर्नराज सिलवालले केही क्षेत्रमा मितव्ययिता अपनाउने गरी भएको घोषणा स्वागतयोग्य रहेको टिप्पणी गरे ।

‘गाडी खरिदलगायतका केही क्षेत्रमा खर्च नगर्ने कुरा आएको छ, जुन स्वागतयोग्य कुरा हो,’ सिलवालले लोकान्तरसँग भने, ‘आर्थिक आत्मनिर्भरताका लागि केही कुराहरू आएका छन् ।’

सीपमूलक तालिममा सरकारले छुट्याएको बजेट सही ढंगले सदुपयोग हुने हो भने राम्रो निष्कर्ष आउने उनको भनाइ छ । 

‘नवउद्यमीलाई दिने भनिएको स्टार्टअप बजेट सानो छ,’ सिलवालले भने, ‘कृषि क्षेत्रमा अलि फोकस कम भयो ।’

ईश्वर अर्याल
ईश्वर अर्याल

लेखकबाट थप...

कमेन्ट गर्नुहोस्