०४ साउन २०८३, सोमबार
भारतको सर्वोच्च अदालतले देशको संविधानबाट इन्डिया शब्दलाई हटाउनका लागि परेको निवेदन बुधवार खारेज गरेको छ ।
दिल्लीमा बस्ने नमः नामक व्यक्तिले भारतको संविधानको धारा १ बाट इन्डिया शब्द हटाएर भारत मात्र राख्न र देशको एक मात्र पहिचान भारत शब्दबाटै दिनका लागि पेश गरेको निवेदनलाई सर्वोच्च अदालतले खारेज गरेको हो ।
निवेदकका अनुसार, इन्डिया नाम दासताको प्रतीक हो र देशका लागि भारत वा हिन्दुस्तान नाम मात्र आवश्यक छ ।
संविधानसभामा भएका बहसहरूलाई उद्धृत गर्दै निवेदकले भारत नाम मात्र राख्न जिकिर लिएका हुन् । विगत केही वर्षमा भारतका विभिन्न ठाउँको नाम परिवर्तन गरिएको सन्दर्भ पनि उनले उल्लेख गरेका छन् ।
तर अदालतले संविधानमा भारत शब्द परिसकेको भन्दै इन्डियालाई हटाउनुको तुक नरहेको भनेको छ । तर सरकारले यस निवेदनलाई ज्ञापनका रूपमा विचार गर्नका लागि अदालतले अनुमति दिएको छ ।
