१५ असार २०८३, सोमबार
पोखराका उद्योगी व्यवसायीले लकडाउन खुकुलो नबनाए उल्लंघन गर्ने चेतावनी दिएका छन् ।
उनीहरूले कोरोनाभन्दा भोकमरीले मर्ने बेला आएको भन्दै लकडाउन खुकुको नपारिए अवज्ञा गर्ने चेतावनी दिएका हुन् ।
पोखरा उद्योग वाणिज्य संघले बुधवार पत्रकार सम्मेलन गरी सुरक्षाको व्यवस्थासहित समयतालिका मिलाएर व्यापार व्यवसाय सञ्चालन गर्नुपर्ने सुझाव सरकारलाई दिएको स्मरण गराउँदै माग सम्बोधन नभए तालाचाबी सरकारलाई नै बुझाउनेसमेत जनायो ।
संघ अध्यक्ष दामु अधिकारीले भने, ‘हाम्रो ध्येय व्यापारमात्रै हैन, व्यापार गर्दै राज्यलाई कर र शुल्क तिर्नुपनि हो अनि अर्थतन्त्रलाई चलायमान बनाउनु पनि हो । कोरोनाबाट व्यापारी मात्रै बच्ने कुरा पनि आउँदैन । हामी हाम्रो र उपभोक्ताहरूको सुरक्षा अनि स्वास्थ्यप्रति सचेत छौं र, सचेतताकै बीचमा व्यापार व्यवसाय गर्न चाहन्छौं ।’
व्यवसायको प्रकृति हेरी समयतालिका अनुसार व्यवसाय खुलेमा त्यसले अर्थतन्त्रलाई गति दिने उनको भनाई छ । तर कुन–कुन पसल खोल्ने भन्ने विषयमा भने स्पष्ट पारिएको छैन ।
सानोतिनो पसल मंगलवारदेखि नै आफूहरूले सुचारू गरेको बताएका छन्।
जेठ २५ सम्म सरकारले भनेझै विभिन्न कर तिर्न नसकिने र समयसीमा असार मसान्तसम्म पुर्याउनु पर्ने संघको माग रहेको पत्रकार सम्मेलनमा जनाइयो ।
झण्डै ३ महिना लामो लकडाउनले व्यापार व्यवसाय हुन नसकेको, कर्मचारीसमेत बिदामा रहेको हुँदा कसरी कर तिर्न सकिन्छ भनी गुनासो व्यवसायीको छ ।
पोखराको निजी क्षेत्रले यसअघि सारेका माग र सुझाव यथावत् रहेको दोहोर्याउँदै परिस्थितिको विषमतालाई ध्यानमा राख्दै प्रदेश र स्थानीय सरकारको अधिकार क्षेत्रमा परेका घरजग्गा कर र अन्य करहरूमा छुटको व्यवस्था गर्न आग्रहसमेत गरिएको छ ।
संघीय सरकारले ल्याएको बजेटले निजी क्षेत्रलाई उत्साहित बनाउन नसकेको तर गण्डकी प्रदेशको नीति तथा कार्यक्रमलाई आफूहरूले खुलेर प्रशंसा गरेको बताइएको छ ।
यस्तै, पोखरामा आयातित तरकारी नष्ट गरिएकोमा आपत्ति जनाउँदै दोषीमाथि कारवाही र क्षतिपूर्तिको माग गरेका छन् ।
कास्की बाहिरबाट तरकारी तथा फलफूल ल्याएको भन्दै पोखरा १५ र ३३ मा वडाध्यक्षकै सक्रियतामा ६ गाडी तरकारी नष्ट गरिएको थियो ।
संकट बेला खाद्यान्न र तरकारी नष्ट गराउनुले कृषि पेशा अपनाउनेहरूलाई हतोत्साही बनाएको उनीहरूको जिकिर छ ।
उनीहरूले घटनाको निन्दा गर्दै तत्काल ती व्यवसायीलाई क्षतिपूर्तिको व्यवस्था गर्न, दोषीलाई कारवाही गर्न एवं आइन्दा यस्ता गतिविधि नदोहोर्याउन माग गरेका छन् ।
कार्यक्रममा सांसद बिन्दुकुमार थापाले परीक्षण दायरा बढाउनु पर्ने माग गरे ।
सरकारले कोरोनाभाइरस महामारी नियन्त्रणका लागि ११ चैतदेखि जारी राखेको लकडाउन जेठ ३२ सम्म डकायम राख्ने निर्णय गरेको छ ।
लकडाउन मोडालिटी फेर्ने विषयमा सरकारले तयारी थाल्दै गर्दा पोखरामा उल्लंघन चेतावनी दिनुलाई कतिपयले निको मानेका छैनन् ।
मंगलवारमात्रै नेपालमा २८८ जना कोरोनासंक्रमित भेटिएका थिए ।'
