काठमाडौं, १४ बैशाख– एक वर्षपछि न्याय परिषद्ले संवैधानिक इजलासलाई पूर्णता दिन न्यायाधीशको सिफारिस गरेको छ ।
बिहीबार बसेको न्यायपरिषद्को बैठकले रिक्त रहेको दुई न्यायाधीशमा दिपकराज जोशी र देबेन्द्र गोपाल श्रेष्ठलाई सिफारिस गरेपछि संवैधानिक इजलासले पूर्णता पाएको छ ।
संविधान निर्माणपछि देखिएका विवाद निरुपण गर्न संविधानले नै संवैधानिक इजलासको परिकल्पना गरेको थियो । तर, लामो समय न्यायाधीश नतोकिंदा संविधानसँग सम्बन्धित कतिपय बिषय अल्झिएका थिए ।
यसअघि पूर्वप्रधानन्यायाधीश कल्याण श्रेष्ठ र न्यायाधीश बैद्यनाथ उपाध्यायको अवकासपछि इजलास गठन हुन सकेको थिएन ।
संवैधानिक इजलासमा न्यायपरिषद्को सिफारिसमा प्रधानन्यायाधीश बाहेक ४ जना न्यायाधीश रहने व्यवस्था छ । यसअघि प्रधानन्यायाधीशसहित वरिष्ठ न्यायाधीशहरु सम्मिलित इजलास गठन भएको थियो । जसमा प्रधानन्यायाधीश सुशीला कार्की न्यायाधीहरु गोपाल पराजुली, चोलेन्द्र सम्शेर जबरा र ओमप्रकाश मिश्र थिए ।
परिषद्ले आज वरिष्ठ मध्यबाटै क्रमश दुई जना न्यायाधीश सिफारिस भएपछि अब संवैधानिक इजलासले पूर्णता पाएको हो । संवैधानिक इजलासको क्षेत्राधिकारमा अहिले १ सय ८० वटा मुद्धा छन् । समयमै संवैधानिक इजलास गठन नहुँदा संवैधानिक इजलासको क्षेत्राधिकारका मुद्धा समेत डिभिजन बेञ्चबाट सुनुवाई हुन थालेका थिए ।
