प्रधानमन्त्री केपी शर्मा ओलीले नेपालीको रोग प्रतिरोधात्मक क्षमता बलियो रहेको दाबी गर्दै कुनै डाक्टर वैज्ञानिक या शोधकर्ताबाट चुनौती आएमा मात्र स्वीकार्ने बताएका छन् । 

नयाँ शैली भनेर पिज्जातर्फ कुद्नुभन्दा ढिंडो र साग नै सही रहेको उनले बताए । 

बुधवार प्रतिनिधि सभा बैठकमा नेपाली कांग्रेसका सांसद गगन थापाले ‘नेपालीको प्रतिरोधी क्षमता राम्रो छ भनेर कसले भन्यो ?’ भन्ने प्रश्न गरेपछि जवाफमा ओलीले स्वतःसिद्ध प्रमाणित भएको विषय भएको बताए । 

‘एकजना माननीय सदस्यले नेपालीको रोग प्रतिरोधी क्षमता राम्रो छ भनेर कसले भन्यो भनेर सोध्नुभयो ? भर्खरै सुन्नुभयो नि ! मैले भनेको, मैले भनेको हो । नेपालीको प्रतिरोधी क्षमाता राम्रो छ भन्ने कुराको चुनौती कुनै डाक्टर, वैज्ञानिक, शोधकर्ताबाट आयो भने मैले स्वीकारौंला,’ ओलीले भने ‘नेपालीको प्रतिरोधी क्षमता राम्रो हुनुमा आधा नेपाली हिमाली पहाडी भेगतिर उकाली ओराली गरेका छन्, स्टामिना बलियो छ । तराईमा बस्नेले पनि हिमालबाट ठोक्किएर आएको हावा खाएका छन् । मरुभूमिबाट तातोहावा आयो भने हिमाल नजिकै पुग्दा कायल भइसक्छ, हिमालसँग ठोक्किएर फर्किएको हावामा सास फेरेका छन् । यो देश, झार उम्रियो भने यार्सागुम्बा भएर निस्कने देश, ढुंगाबाट शिलाजित झर्ने यो देश औषधिको देश हो, यस देशको पानी हिमालमाथि बसेर पग्लिएर अनेकन मिनरल तत्वसँग रसाएर निस्केको पानी हो । त्यसकारण यो उकाली ओराली गर्ने शारीकि श्रम गर्नेको स्वभाविक कुरा हो । योगाको ट्रेडिसन छ, यस देशमा । जहाँ योगा पैदा भयो, इम्युन सिस्टम तगडा छ भन्न्ने कुरा स्पष्ट सिद्ध छ ।’

ओलीले नेपालीहरूको भान्सामा औषधीय तत्वहरू प्रयोग भइरहेको भन्दै नयाँको नाममा पिज्जा संस्कृतिमा जान नहुने बताए ।

‘हाम्रो भान्सामा पाउरोटीमा बटर दलेर खाने होइन, दालचामल, मकै, भटमास हुन्छन्, बेसार अनिवार्य हुन्छ, नुन, जिरा धनिया लसुन अदुवा अनिवार्य हुन्छ । यी सबै औषधी हुन् । हरेक दिन औषधी खाएको नेपालीको प्रतिरोध क्षमता माथि हुन्छ भन्ने कुरा स्वतः सिद्ध  छ । अवश्य राम्रो छ, यसलाई हाम्रा परम्परागत तरिका, भान्साको तरिकामा कायम रहनुपर्छ, नयाँ शैली भनेर पिज्जातर्फ कुद्नुभन्दा ढिंडो र साग नै सही छ,’ ओलीले भने ।