समुदायस्तरमै कोरोनाको उच्च जोखिम बढेपछि स्याङ्जाको गल्याङ बजार एक साताका लागि बन्द गरिएको छ । सरकारले लकडाउन खुकुलो पार्दै बजार पसल खोल्न सकिने बताए पनि सोको २ दिन नबित्दै जिल्लाको व्यस्त बजार गल्याङ बन्द हुन पुगेको हो । 

शुक्रवार नगर बैठकले कोरोना संक्रमण समुदायस्तरमै फैलिने क्रममा रहेको निष्कर्ष निकाल्दै साता दिनका लागि नगर बन्द गर्ने निर्णय गरेकोमा शनिबारदेखि बिहानैदेखि औषधी पसल, दूध डेरी र तरकारीबाहेक सबै बजार पसल बन्द छन् । नगरभित्र बित्तीय संस्था र खाद्यान्न पसलहरू पनि बन्द गरिएको छ । 

नगरप्रमुख भूपराज अधिकारीले खाद्यान्नका सवारीसाधन समेत बन्द हुने भन्दै स्वास्थ्यका लागि एकजुट हुने बेला आएको बताए । उनले गल्याङ नगरवासीको स्वास्थ्यलाई पहिलो प्राथमिकता दिएको हुँदा सुरक्षित र सचेत रहन सम्पूर्ण नगरवासीमा आग्रह गरे । 

नगर बैठकमा सरोकारवाला निकायहरू वडाध्यक्ष, गल्याङ उद्योग वाणिज्य संघ, चेम्बर अफ कमर्स तथा कालीगण्डकी यातायात समितिका प्रतिनिधि, सुरक्षाकर्मी लगायतको उपस्थिति थियो । 

भारत सीमानाकाबाट उद्धार गरी ल्याइएका व्यक्तिहरूसहित शुक्रबार एकैपटक १८ जनामा कोरोना भाइरस संक्रमण देखिएको थियो । गल्याङ बहुमुखी क्याम्पसमा निर्मित क्वारेन्टाइनमा उनीहरू सहित ९५ जना बस्दैआएका थिए ।

क्वारेन्टाइन सरसफाइमा कार्यरत गल्याङकै एक दम्पतीमा कोरोना भाइरस पुष्टि भएको थियो । संक्रमितको कन्ट्याक्ट टे«सिङ गरी परीक्षण तयारी गरिएको छ ।  जसमा नगरपालिकाका जनप्रतिनिधि, कर्मचारी, सुरक्षाकर्मी सहितका व्यक्तिहरू रहेका छन् । 

यसबीचमा अत्यावश्यक कामबाहेक घरबाहिर ननिस्कन र उच्च सतर्कता अपनाउन नगरपालिकाले आग्रह गरेको छ । सिद्धार्थ राजमार्गकाे साे सडकखण्डमा लामाे दुरीका सवारीसाधनलाई भने छेकबार छैन ।
संक्रमितको भने भीरकोटको हेलुस्थित कालिका सामुदायिक अस्पतालको आइसोलेसन वार्डमा उपचार भइरहेको छ । 

स्याङ्जामा हालसम्म ६० जनामा कोरोना भाइरस संक्रमण देखिएको छ । धमाधम कोरोना संक्रमित देखिन थालेपछि गल्याङमै पनि नगर स्वास्थ्य अस्पतालमा कम्तीमा ५० बेडको आइसोलेसन वार्ड थप्ने तयारी छ । 
यता, गण्डकी प्रदेशमा शनिबार ५ जनामा काेराेना भेटिएसँगै कुल १ सय ९७ पुगेका छन् ।