लद्दाखको गलवानमा सोमवार राति भएको भिडन्तका लागि जिम्मेवार भारतीय सैनिकहरूलाई कठोर सजाय दिन चीनका परराष्ट्रमन्त्री वाङ यीले भारतलाई आग्रह गरेका छन् । 

सीमामा खटिएर अग्रपंक्तिमा रहेका सैनिकलाई नियन्त्रण गर्न पनि उनले सुझाव दिएका छन् । 

सोमवार राति भएको भिडन्तमा भारतका २० सैनिकको मृत्यु भएको छ भने चिनियाँ पक्षतर्फको हताहतीको विवरण सार्वजनिक गरिएको छैन ।

रोयटर्स समाचार संस्थाले चीनको परराष्ट्र मन्त्रालयलाई उद्धृत गर्दै दिएको खबर अनुसार, चीन र भारतले सीमा विवादलाई इमान्दार तवरले समाधान गर्न र परिस्थितिलाई नचर्काउनका लागि शीघ्र प्रयास गर्न सहमति जनाएका छन् ।