गृह मन्त्रालयको पास बनाई जाजरकोट आएर फर्किएका दुई गाडीलाई सशस्त्र प्रहरी सुर्खेतले नियन्त्रणमा लिई जिल्ला प्रहरी कार्यालय सुर्खेतलाई अनुसन्धानका लागि बुझाएको छ ।

बा १८ च ७६२१ नम्बरको हाइलेक्स र बा १५ च ३५०५ नम्बरको स्कारपियो गाडी सशस्त्र प्रहरी सुर्खेतको टोलीले नियन्त्रणमा लिएको थियो । भेरीगंगा नगरपालिकाको छिन्चु बजारबाट बिहीवार राति सशस्त्र प्रहरीको गस्ती टोलीले नियन्त्रणमा लिएको थियो ।

छिन्चुस्थिल मनकामना होटलबाट नियन्त्रणमा लिएका एक हाइलेक्स र एक स्कारपियो गाडीले गृह मन्त्रालयबाट ट्राभल्स एण्ड टुर्सको नाममा पास बनाएको स्रोतले जानकारी दिएको छ ।

बहुमुल्य पत्थर काइनाइट र टुर्मालिन पत्थर चोरी, निकासी हुँदै गरेको विशेष सूचनाका आधारमा दुई वटा भिआइपी गाडी सशस्त्र प्रहरी गस्ती टोलीले नियन्त्रणमा लिइएको प्रहरी श्रोतको जनाएको छ ।

सरकारले २०७२ सालदेखि तेस्रो मुलुक निकासी बन्द गरेको जाजरकोटको बहुमुल्य पत्थर काइनाइट र टुर्मालिन पत्थर निकासीका लागि दुई वटा गाडी प्रयोग भएको आशंकामा पक्राउ गरिएको जनाइएको छ । 

जाजरकोटमा पाइने बहुमुल्य पत्थरको बजारमुल्य ५ सयदेखि २५ हजार प्रतिकिलो पर्ने गर्दछ । सरकारले उत्खनन स्वीकृति दिएपनि देशभित्र प्रशोधन उद्योग नहुँदा चोरी निकासी तेस्रो मुलुक भारत, चीन, अमेरिका पुर्‍याउने गरिएको छ ।

सुर्खेत प्रहरीका धेरै स्थानमा चेकपोस्ट भएतापनि प्रहरीले नसमात्नु शंकास्पद देखिएको छ ।

सशस्त्र प्रहरी सुर्खेतको गस्ती टोलीले पक्राउ गरी शुक्रवार बिहान जिल्ला प्रहरी कार्यालय सुर्खेतलाई बुझाएको छ । जिल्ला प्रहरी कार्यालय सुर्खेतका प्रहरी नायव उपरीक्षक (डिएसपी) रामप्रसाद घर्तीले घटनाको विषयमा अनुसन्धान भइरहेको जानकारी दिए ।

गाडीसँगै नियन्त्रणमा लिएका व्यक्तिहरुलाई सोधपुछ, प्रारम्भिक बयान लिने काम भइरहेको उनले जानकारी दिए । ‘हामी अनुसन्धानकै क्रममा भएकाले थप विवरण आउन बाँकी छ । अनुसन्धान गरेपछि सबै जानकारी गराउँ,’ उनले भने ।