विकसित पछिल्लो राजनीतिक घटनाक्रमको समीक्षा तथा पार्टीको महाधिवेशनको कार्यतालिकाबारे छलफल गर्न नेपाली कांग्रेस केन्द्रीय समितिको बैठक मंगलवार बस्दैछ ।

पार्टी केन्द्रीय कार्यालय सानेपामा बस्ने बैठकमा जिल्ला अधिवेशनको मिति, क्रियाशील सदस्यता वितरण लगायत विषयमा छलफल हुने केन्द्रीय सदस्य रामकृष्ण यादवले जानकारी दिए । 

कांग्रेसको १४ औं महाधिवेशन २०७७ फागुन ७ देखि १० गतेसम्म गर्ने कार्यतालिका बनेको थियो । कोरोना संकटका कारण जिल्ला अधिवेशन लगायत महाधिवेशनका अन्य कार्यक्रम प्रभावित हुनसक्ने भएपछि कांग्रेस छलफलमा जुट्न लागेको हो । 

बैठकमा कोरोना रोकथाममा सरकारले गरेका काम, स्वास्थ्य सामाग्री खरिदमा भएको अनियमितता लगायतलाई लिएर सदन र सडकमा सशक्त दवाव दिने कार्यक्रमबारे समेत छलफल हुने केन्द्रीय सदस्य यादवले जानकारी दिए ।

केन्द्रीय समिति बैठक मंगलवार दिउसो १ बजेका लागि बोलाइएको छ ।