०२ साउन २०८३, शनिबार
अमेरिकाका विभिन्न विश्वविद्यालयमा अध्ययनरत हजारौं विदेशी विद्यार्थीहरूलाई अन्लाइन कोर्स लिनुपर्ने अवस्था आएमा सुपुर्दगी गरिने भनी ट्रम्प प्रशासनले प्रस्ताव गरेको नीति फिर्ता लिएको छ ।
प्रस्तावित नीतिका सम्बन्धमा हार्वर्ड विश्वविद्यालय र मासाचुुसेट्स इन्स्टिच्युट अफ टेक्नोलोजीले ट्रम्प प्रशासनविरुद्ध दायर गरेको मुद्दामा सुनुवाइ गरिसकेपछि यूएस डिस्ट्रिक्ट न्यायाधीश एलिसन बोरोजले नयाँ नीति खारेज गराउन प्रशासन सहमत भएको घोषणा गरे ।
यी दुई विश्वविद्यालयलाई अन्य सयौं विश्वविद्यालय तथा क्याम्पस र प्रविधि कम्पनीहरूले मुद्दा दर्ता गर्न साथ दिएका थिए । उनीहरूले ट्रम्प प्रशासनसँगै इम्मिग्रेसन यान्ड कस्टम्स इन्फोर्समेन्टविरुद्ध मुद्दा दर्ता गरेका हुन् ।
नयाँ नियमले विद्यार्थीहरूलाई हानि गर्ने मात्र नभई अमेरिकालाई अर्बौं डलरबाट वञ्चित गराउने पनि उनीहरूको जिकिर थियो ।
यसका साथै यस नियमले सुरक्षित अवस्था नआइसकेको अवस्थामा विश्वविद्यालय पुनः खोल्न लगाउँदा सार्वजनिक स्वास्थ्यलाई समेत जोखिममा पार्ने उनीहरूले बताएका थिए । हार्वर्ड विश्वविद्यालयले फल सेमेस्टरका अधिकांश कक्षाहरू अन्लाइन सञ्चालन गर्ने भएको छ भने एमआईटीले अन्लाइन र भौतिक कक्षा दुवैको मिश्रित मोडल अपनाउने भएको छ ।
यी विश्वविद्यालय बाहेक १७ वटा राज्य र वाशिङटन डीसीका डिस्ट्रिक्ट एटोर्नीहरूले उस्तै किसिमका जिकिर लिँदै बेग्लै मुद्दा दायर गरेका थिए ।
