पोखरा, १९ वैशाख– आसन्न स्थानीय चुनावका लागि नेकपा माओवादी केन्द्रले पोखरा लेखनाथ महानगरपालिकाको मेयर र उपमेयरका उम्मेदवारको टुंगो लगाएको छ ।
क्षेत्रफलका सिहवाले देशकै ठूलो महानगर पोखरा लेखनाथको मेयरमा विश्वप्रकाश लामिछाने उपमेयरमा गोमा ढकाललाई उम्मेदवार बनाइएको माओवादी केन्द्रले जनाएको छ ।
पोखराको मेयर र उपमेयरको उम्मेदवार छान्न माओवादीको कास्की जिल्ला कमिटीले दिनभर छलफल गरेको थियो । उक्त छलफलमा सहमति जुट्न नसकेपनि माओवादीले मनोनयन दर्ता गर्ने दिन (आज) विहानै उम्मेदवारको टुंगो लगाएको हो ।
लामिछाने माओवादी केन्द्रका केन्द्रीय कार्यालय सदस्य हुन् । डा. बाबुराम भट्टराई प्रधानमन्त्री भएका बेला उनी पोखरा नगर विकास समितिको अध्यक्ष समेत बनेका थिए ।
यस्तै उपमेयरको उम्मेदवार ढकाल माओवादी केन्द्रका केन्द्रीय कार्यालय सदस्य हुन् । उनी पर्यटन ब्यवसायमा संलग्न छिन् ।
प्रमुख तीन पार्टीबीच तीब्र प्रतिस्पर्धा हुने आकलन गरिएको पोखरा लेखनाथ महानगरपालिकाको मेयरमा नेपाली कांग्रेसले नरेशशंकार पालिखे र उपमेयरमा चन्द्रावती पौडेललाई अगाडि सारेको छ ।
यस्तै नेकपा एमालेले मानबहादुर जिसीलाई मेयर र मञ्जु गरुङलाई उपमेयरको उम्मेदवारका रुपमा अगाडि सारेको छ ।
