झापाको कनकाई नगरपालिकास्थित कोटिहोममा कोरोना परीक्षणका लागि पीसीआर मशिन खरिद गर्न जिल्ला सहकारी संघ झापाले २५ लाख रुपैयाँ सहयोग गरेको छ ।
     
संघले विभिन्न सहकारी संस्थामार्फत संकलन गरेको रकम ‘एकका लागि एक अभियान’का सहसंयोजक विनोद बस्नेतलाई शनिवार प्रदान गरिएको थियो ।

सो रकमकोे चेक जिल्ला सहकारी संघका अध्यक्ष गणेश ढकाल, उपाध्यक्ष गीता कुँवर र नेपाल बहुउद्देश्यीय सहकारी संस्थाका कार्यकारी प्रमुख लक्ष्मी उप्रेतीले संयुक्तरूपमा प्रदान गरेका थिए ।

सहारा नेपाल सहकारी संस्थासहित विभिन्न २८ वटा संघसंस्थाको अगुवाइमा यहाँका नागरिकस्तरबाट प्रयोगशाला स्थापना गरिएको छ तर औपचारिकरूपमा सञ्चालनमा भने आएको छैन । अभियानअन्तर्गत १ करोड ६८ लाख संकलन भइसकेको र ४७ लाख खाद्यान्न, भीटीएम, आरडीटी किट खरिद लगायतका शीर्षकमा खर्च भएको बताइएको छ ।
 
कोटिहोममा स्थापना गरिएको प्रयोगशाला प्रदेश नम्बर १ सरकारलाई हस्तान्तरण गर्ने तयारी समेत भइरहेको अभियान संयोजक महेन्द्रकुमार गिरीले जानकारी दिए ।