०३ साउन २०८३, आइतबार
पार्टी भित्र देखिएको विवाद समाधानका लागि छलफल गर्न अविलम्ब बेन्द्रीय कमिटीको बैठक बोलाउन माग गर्दै नेपाल कम्युनिस्ट पार्टी (नेकपा)का एक चौथाई सदस्यले पार्टी केन्द्रीय कार्यालयमा निवेदन दर्ता गरेका छन् ।
अध्यक्ष पुष्पकमल दाहाल प्रचण्ड र माधवकुमार नेपाल पक्षधर १ सय ५२ केन्द्रीय सदस्यले हस्ताक्षरसहित केन्द्रीय कमिटी बैठक बोलाउन माग गरेका हुन् ।
पार्टी अध्यक्ष र महासचिवलाई सम्वोधन गर्दै पार्टी केन्द्रीय कार्यालय धुम्बाराहीमा दर्ता गराइएको केन्द्रीय सदस्य निरज आचार्यले लोकान्तरलाई जानकारी दिए । स्रोतका अनुसार १ सय ५२ सदस्यले हस्ताक्षर गरेका छन् ।
स्थायी कमिटी बैठकले निकास दिन नसकेको भन्दै केन्द्रीय सदस्य डा. वियज पौडेल, जगन्नाथ खतिवडा, ठाकुर गैरे, रामकुमारी झाँक्री लगायतको नेतृत्वमा केन्द्रीय सदस्यहरुले हस्ताक्षर अभियान संचालन गरेका थिए ।
नेकपाको अन्तरिम विधान २०७५ को दफा ५९ को उपदफा ४ मा एक चौथाइ सदस्यले हस्ताक्षर गरेर बैठक बोलाउन माग गरेमा एक महिनाभित्र केन्द्रीय कमिटीको बैठक बोलाउनुपर्ने व्यवस्था छ । पार्टी एकता भएपछि गत माघ महिनामा पहिलोपटक नेकपाको केन्द्रीय कमिटीको बैठक बसेको थियो ।
केन्द्रीय कमिटी बोलाउनका लागि नेकपाका तत्काल कायम रहेका ४ सय ४४ जना केन्द्रीय सदस्यको एक चौथाइ अर्थात १ सय १२ जनाको हस्ताक्षर आवश्यक हुन्छ ।
असार १० गते शुरु भएर पटक-पटक स्थगित स्थायी कमिटी बैठकले निकास दिन नसकेकोले केन्द्रीय कमिटी बैठक आह्वान गर्ने निर्णयमा पुगेको केन्द्रीय सदस्य चूडामणि जंगली विश्वकर्माले जानकारी दिए । स्थायी कमिटी बैठक अनिर्णित बनेको समयमा उनीहरुले जूम बैठक गरेर केन्द्रीय समिति बैठक बोलाउने माहौल तयार गरेका थिए ।
मंगलवारसम्म आइपुग्दा स्थायी कमिटी बैठकले निकास दिने लक्षण नदेखिएपछि हस्ताक्षर बुझाइएको अर्का एक केन्द्रीय सदस्यले बताए ।
