सन् २०१८ मा डोनल्ड ट्रम्पले अमेरिकालाई इरान आणविक सम्झौताबाट झिकेपछि पुनः लगाएको प्रतिबन्ध अहिले फेरि थपेको छ । 

बिहीवार अमेरिकाका परराष्ट्रमन्त्री माइक पोम्पेओले इरानका विभिन्न परियोजनामा उपयोग गरिने थप २२ पदार्थ बनाउने धातुहरूमाथिको प्रतिबन्ध बढाएको हो । 

‘आज परराष्ट्र मन्त्रालयले इरानको आणविक, सैन्य तथा ब्यालिस्टिक क्षेप्यास्त्र कार्यक्रममा प्रयोग हुने २२ वटा विशिष्ट पदार्थको पहिचान गरेको छ । इरानलाई जानाजान यी पदार्थहरू दिनेहरूमाथि प्रतिबन्ध लगाइनेछ,’ पोम्पेओले बयान जारी गरेर बताए । 

पोम्पेओले इरानको रिभोल्युसनरी गार्ड्सको निर्माण कम्पनी र उसका शाखा प्रशाखालाई संयुक्त राष्ट्रसंघले प्रतिबन्ध लगाएको बताए । उनीहरू फोरदोमा युरेनियम प्रवर्द्धन केन्द्र निर्माणमा प्रत्यक्ष संलग्न थिए । 

‘रिभोल्युसनरी गार्ड्सको यो निश्चयका कारण ग्राफाइट वा कच्चा वा आधा सकिएका धातु इरानबाट बाहिर वा बाहिरबाट इरानमा कारोबार गर्न प्रतिबन्ध लगाइएको छ,’ बयानमा लेखिएको छ ।