काठमाडौं, १९ बैशाख– बैशाख ३१ गते पहिलो चरणमा सञ्चालन हुने ३ वटा प्रदेशका ३४ जिल्लाका २८३ स्थानीय तह निर्वाचनका लागि आज भएको उम्मेदवारी मनोनयन पत्र दर्ता कार्य शान्तिपूर्ण तथा उत्साहजनकरुपमा सम्पन्न भएको निर्वाचन आयोगले जनाएको छ ।
प्रमुख निर्वाचन आयुक्त डा. अयोधीप्रसाद यादवले पहिलो चरणअन्तर्गत मङ्गलबार भएको उम्मेदवारी मनोनयन दर्ता शान्तिपूर्ण र उत्साहजनक रुपमा सम्पन्न भएको बताए ।
उनले निर्वाचनमा देखिएको उत्साहले निर्वाचन आयोगले खुसी र गौरव महसुस गरेको बताए । काठमाडौं र ललितपुर जिल्लाको मुख्य निर्वाचन अधिकृतको कार्यालय पुगेर उम्मेदवारी मनोनयन प्रक्रियाको अवलोकनका क्रममा उनले सो कुरा बताएका हुन् । यादवले काठमाडौंका मुख्य निर्वाचन अधिकृत पुरुषोत्तम ढकाल र ललितपुरका मुख्य निर्वाचन अधिकृत बालकृष्ण दवाडीबाट ती जिल्लाको समग्र मनोनयन प्रक्रियाबारे जानकारी लिएका थिए ।

उम्मेदवारी दर्ताका लागि बिहान १० बजेदेखि अपरान्ह ५ बजेसम्म समय तोकिए पनि साँझ ५ बजेभित्र लाममा बसिसकेका उम्मेदवारहरूको मनोनयन दर्ता प्रक्रिया साँझसम्म चलेको निर्वाचन आयोगका प्रवक्ता सूर्यप्रसाद शर्माले जानकारी दिए ।