काठमाडौं, २० वैशाख– नेपाली कांग्रेसका सभापति शेरबहादुर देउवा जेठको पहिलो साता मुलुकको ४० औं प्रधानमन्त्री बन्ने भएका छन् । पहिलो चरणको स्थानीय निर्वाचन सकिएसँगै देउवा नयाँ प्रधानमन्त्री बन्न लागेका हुन् ।
प्रधानमन्त्री पुष्पकमल दाहाल ‘प्रचण्ड’ का प्रमुख राजनीतिक सल्लाहकार चक्रपाणि खनालले त्यसको खुलासा गरेका हुन् ।
बुधबार रिपोर्टर्स क्लब नेपालले आयोजना गरेको साक्षात्कारमा बोल्दै खनालले स्थानीय तहको पहिलो चरणको निर्वाचनपछि देउवा प्रधानमन्त्री हुने बताएका हुन् ।
साथै उनले कांग्रेस–माओवादी गठबन्धन कायमै रहने पनि दावी गरे । ‘कांग्रेस र माओवादीबीच भएको भद्र सहमति तोडिँदैन,’ खनालले भने, ‘हामीबीच भएको सहमती अनुसार स्थानीय तहको वैशाख ३१ गतेको पहिलो चरणको निर्वाचन लगत्तै देउवाजी प्रधानमन्त्री बन्नुहुन्छ, ढुक्क भए हुन्छ ।’
खनालले बजेट र अर्काे चुनावको तालमेल कसरी मिलाउने भन्नेबारेमा गम्भीर छलफल भइरहेको पनि बताए । सहमति अनुसार नै यसमा निर्णय लिइने उनको भनाइ थियो ।
