१२ साउन २०८३, मंगलबार
बलिउड अभिनेता सुशान्त सिंह राजपूतको मृत्यु प्रकरण अनुसन्धानमा सीबीआई नयाँ मोडमा पुगेको छ ।
सीबीआई रिया चक्रवर्ती र उनका बुवा इन्द्रजीत चक्रवर्तीमाथि अनुसन्धान केन्द्रित गर्ने निष्कर्षमा पुगेको छ । अनुसन्धानका क्रममा सोधपुछ गर्न दुवैलाई सीबीआईमा बोलाउने तयारी भइरहेको भारतीय सञ्चारमाध्यम नवभारत टाईम्सले लेखेको छ ।
सुशान्तका बुवाले दिएको जाहेरीका आधारमा रिया मुख्य आरोपी छिन् । अनुसन्धानका लागि सोमवार सीबीआईले सोधपुछ गर्न सक्ने जनाइएको छ ।
स्रोतका अनुसार सीबीआईको टीम रियासँग लामो र धेरै दिनसम्म सोधपुछ गर्नसक्छ । जाहेरीमा रियालाई शंकास्पद मानिएको छ भने प्रश्नको घेरा समेत ठूलो छ । सीबीआईले पहिलो चरणमा २६ प्रश्न सोध्न सक्ने टाईम्सले लेखेको छ ।
यी हुन् रियालाई सोधिनसक्ने २६ प्रश्न –
१. तपाईं र सुशान्तबीच यस्तो के भयो, जसले गर्दा तपाईं ८ जुनको दिन उनको घरबाट जानुभयो ?
२. के सुशान्त कुनै कुरालाई लिएर हैरान थिए ? यदि हो भने त्यो के थियो ?
३. सुशान्तको मृत्यु भएको दिन अर्थात् १४ जुनमा तपाईं कहाँ हुनुहुन्थ्यो र के गर्दै हुनुहुन्थ्यो ?
४. सुशान्त कुन किसिमको औषधि सेवन गर्थे ?
५. के तपाईंले सुशान्तलाई कुनै डाक्टरसँग भेटाउनुभएको थियो ?
६. सुशान्त हिन्दुजा अस्पतालमा किन भर्ना भएका थिए ?
७. के तपाईंले सुशान्तको परिवारलाई स्वास्थ्य खराब भएकोबारे जानकारी दिनुभएको थियो ?
८. के तपाईंले सुशान्तसँग कुनै फिल्म सम्झौता गर्नुभएको थियो ?
९. के तपाईंको बुवाले सुशान्तलाई कुनै औषधि सेवन गर्न भन्नुभएको थियो ?
१०. के सुशान्तका पैसासँग जोडिएका निर्णय तपाईं लिनुहुन्थ्यो ?
११. सुशान्तसँग तपाईंको सम्बन्ध के थियो ?
१२. के सुशान्तको मृत्युपछि तपाईंले सुशान्तको परिवारलाई फोन गर्नुभयो ?
१३. के तपाईं सुशान्तको मृत्युपछि उनको घर जानुभयो ?
१४. तपाईं कपूर अस्पतालको शवगृहमा के गर्न जानुभएको थियो ?
१५. तपाईंसँग मुम्बई पुलिसले कतिपल्ट सोधपुछ पर्यो ?
१६. तपाईंले सुशान्तसँग मिलेर एक नयाँ कम्पनी किन बनाउनुभयो ?
१७. लकडाउनमा तपाईंको घरमा तपाईंलाई भेट्न को–को आउनुहुन्थ्यो ?
१८. सुशान्तकी बहिनीसँग तपाईंको कुनै झगडा छ ?
१९. तपाईंले सुशान्त र आफ्नो सम्बन्धबारे क–कसलाई बताउनुभएको थियो ?
२०. तपाईंले डीबीपी (बान्द्रा) लाई किन फोन गर्नुभएको थियो ?
२१. तपाईंलाई के लाग्छ सुशान्तको मृत्यु कसरी भयो ?
२२. तपाईंले सिद्धार्थ पिठानीलाई कहिले भेट्नुभयो ?
२३. तपाईंले सुशान्तको घरको कर्मचारीलाई जागिरबाट किन निकाल्नुभयो ?
२४. के तपाईं पिठानी र सैमुअल मिरान्डाको सम्पर्कमा हुनुहुन्छ ?
२५. युरोप भ्रमणमा के भएको थियो ?
२६. सुशान्तको बैंक खाताबाट पैसा कहाँ गए ? खर्च भए त कहाँ भए ?
सोमवारै अनुसन्धानका क्रममा सीबीआई टीम वाटरस्टोन रिसोर्ट पुगेको छ । यो रिसोर्टमा सुशान्त २ दिन बसेका र रियाको परिवारले ‘जादू–टोना’वाला पूजा गरेको बताइन्छ । सुशान्तका कूक निरज, दीपेश सावन्त र सिद्धार्थ पिठानीसँग हासम्म गरिएको सोधपुछमा सीबीआईले धेरै ठाउँमा अन्तर पाएको छ । यसैक्रममा सोमवार समेत पिठानीसँग थप सोधपुछ हुनसक्ने टाईम्सले लेखेको छ ।
