११ साउन २०८३, सोमबार
म्यानचेस्टर सिटी क्लबले लियोनेल मेस्सी र पेप ग्वार्डिओला दुवैलाई आफूकहाँ राख्नका लागि सम्झौता गर्ने बेलायती पत्रिका द मिररले दाबी गरेको छ ।
मेस्सीलाई बार्सिलोेनाबाट किनेर ल्याउन आफूहरू सफल हुने सिटीको विश्वास छ । ६ पटकका बालून दोर विजेता मेस्सीले नाओ क्याम्प छोड्ने निर्णयबाट पछि नहट्ने संकेत दिएका छन् ।
३३ वर्षीय मेस्सी क्लबमा आए भने व्यवस्थापक ग्वार्डिओला पनि अर्को तीन वर्षसम्म क्लबमै बस्नेछन् भनी सिटीलाई थाहा छ ।
बार्साका नयाँ प्रशिक्षक कोम्यानले मेस्सी विनाको टोलीको योजना बनाउन थालिसकेका छन् ।
मेस्सीको रिलीज क्लज ६३० मिलियन पाउन्ड तिराउन सिटीलाई बाध्य बनाउने गरी अदालतमा जानुको साटो बार्सिलोना प्रमुखहरू मेस्सीलाई बेच्नका लागि सिटीसँग २५० मिलियन पाउन्ड र खेलाडीहरूको अपेक्षा गरिरहेका छन् ।
मेस्सीलाई पेरिस सेन्ट जर्मान र इन्टर मिलानबाट पनि ठूलै अफरहरू आएका छन् भने युभेन्टसले पनि उनलाई किन्नका लागि अन्तिम समयमा आएर प्रयास गरिरहेको छ ।
तर मेस्सीलाई सिटी जान मन छ किनकि उनका पूर्व प्रशिक्षक ग्वार्डिओला त्यहीँ छन् र ग्वार्डिओला यस सीजनको अन्त्यपछि क्लबबाट ननिस्कने शर्तमा उनी त्यहाँ आउन चाहन्छन् ।
ग्वार्डिओला सिटी व्यवस्थापकका रूपमा पाँचौं सीजनमा छन् र उनको सम्झौता अर्को वर्ष सकिँदैछ ।
उनकी पत्नी क्रिस्टिना उनीहरूकी कान्छी छोरीसहित एक वर्षअघि बार्सिलोना सरेकी छन् र फेशन व्यापारमा काम गर्नका लागि समय दिन चाहिरहेकी छन् ।
सिटीले सन् २०२१ पछि पनि ग्वार्डिओला क्लबमै रहून् भन्ने चाहेका छन् । मेस्सी क्लबमा आए भने ग्वार्डिओला बस्ने पक्का छ ।
