०९ असार २०८३, मंगलबार
स्वास्थ्य तथा जनसंख्या मन्त्रालयले पछिल्लो २४ घण्टामा गरिएको १२ हजार ७ सय १७ पीसीआर परीक्षणमा १ हजार २ सय २१ जनामा संक्रमण देखिएको जनाएको छ ।
एक दिनमा पत्ता लागेको संक्रमितको यो संख्या हालसम्मकै उच्च हो ।
मन्त्रालयका प्रवक्ता डा. जागेश्वर गौतमले आइतवार नियमित प्रेस ब्रिफिङका क्रममा पछिल्लो २४ घण्टामा १२ सय २१ जनामा संक्रमण देखिएको बताएका हुन् ।
यससँगै अहिले नेपालमा सक्रिय संक्रमितको संख्या १७ हजार ५ सय १८ पुगेको छ । तीमध्ये १० हजार ६ सय १२ जना संस्थागत आइसोलेसनमा रहेका छन् भने बाँकी होम आइसोलेसनमा छन् ।
डा. गौतमले पछिल्लो २४ घण्टामा २ सय ६७ संक्रमणमुक्त भएर डिस्चार्ज भएको बताए । यससँगै हालसम्म २० हजार ८ सय २२ जना संक्रमणमुक्त भएर डिस्चार्ज भइसकेका छन् ।
डा. गौतमले काठमाडौँ उपत्यकामा पछिल्लो २४ घण्टामा ४ सय २९ संक्रमित भएको बताए । काठमाडौँ जिल्लामा ३ सय ७२, भक्तपुरमा ४५ र ललितपुरमा १२ जनामा संक्रमण फेला परेको हो ।
