संयुक्त राज्य अमेरिकामा मुख्यालय रहेको सोसल कमर्स कम्पनी सगूनले मिनी आईपीओमा सेप्टेम्बर महिनाभित्र लगानी गर्न आह्वान गरेको छ ।
  
संयुक्त राज्य अमेरिकाको सेक्युरिटिज एण्ड एक्सचेन्ज कमिसन (एसईसी) ले यसै वर्षको शुरूमा सगूनलाई मिनी आईपीओ जारी गर्न अनुमति दिएको थियो ।

जसअनुसार सगूनले नेपाल, उत्तर कोरिया र इरानबाहेक संसारका जुनसुकै मुलुकका नागरिकलाई प्रतिशेयर ३० डलरका दरले ‘ग’ वर्गको धितोपत्र बिक्री गर्न पाउने छ । नेपाल सरकारले विदेशी मुद्रामा देशबाहिर रहेका कम्पनीको शेयर खरिद गर्न प्रतिबन्ध लगाएको छ भने अमेरिकी कानूनले उत्तर कोरिया र इरानका नागरिकलाई अमेरिकन कम्पनीको शेयर खरिद गर्न रोक लगाएको छ । 

‘सन् २०२० मा कम्पनीले धेरै उत्साहजनक प्रगति गरेको छ,’ सगुन इंकका संस्थापक गोविन्द गिरीले भने, ‘हामीले दोस्रो मिनी आईपीओ अन्तर्गतको शेयर बिक्री सेप्टेम्बर ३०, २०२० अर्थात् अबको १ महिनासम्म मात्रै खुला गर्ने निधो गरेका छौं ।’ 

गत जनवरी २०२० यता सगून प्रयोगकर्ताको संख्या ४५ लाखले थपिएको छ भने हालसम्म विश्वव्यापी कूल प्रयोगकर्ताको संख्या ८१ लाख नाघेको कम्पनीले जनाएको छ ।
 
जनवरी २०२० यता सगूनमा प्रयोगकर्ताले १.२ अर्ब स्मार्ट कोइनहरू कमाएका छन्, जसमध्ये २२ करोड ८० लाख स्मार्ट कोइनहरू किनमेल गर्न खर्च गरिसकेका जनाइएको छ ।

नेपाल तथा भारतमा प्रयोगकर्तामाझ सगून लोकप्रिय बन्दै जाँदा प्रतिष्ठित व्यवसायसँग सगूनको साझेदारी पनि बढिरहेको छ । नेपालमा प्रभू ग्रूप, भाटभटेनी, फेवा बजारसँग सहकार्य भइसकेको छ भने मिनिसो, नबिल बैंक र अमेजन इन्डियासँग सहकार्यको प्रक्रिया अगाडि बढेको जनाइएको छ ।