२६ जेठ २०८३, मंगलबार
मालपोत कार्यालय तनहुँको गतिविधिलाई सीसी क्यामेराले निगरानी गरिराखेको छ ।
भूमि व्यवस्था, सहकारी तथा गरीबी निवारण मन्त्रालय, भूमि व्यवस्था तथा अभिलेख विभागको सहयोगमा साउन्ड रेकर्ड सहितको सीसी क्यामेरा जडान गरिएपछि सो कार्यालयको गतिविधिको निगरानी भइरहेको हो ।
मन्त्रालय र विभागले सबै मालपोत कार्यालयमा सीसी क्यामेरा जडान गर्ने अभियान थालेको छ । सीसी क्यामेरामा रेर्कड भएका कुरा ६ महिनासम्म सुरक्षित रहने मालपोत कार्यालय तनहुँले जनाएको छ । सीसी क्यामेरा जडानले लेखापढी कानून व्यवसायी र कर्मचारीबीच हुने भनिएको आर्थिक चलखेल र अनियमितता पूर्णरूपमा अन्त्य हुने विश्वास गरिएको मालपोत कार्यालय तनहुँका प्रमुख शेरबहादुर भण्डारीले बताए ।
उनका अनुसार कार्यालयको सुरक्षा, कर्मचारीद्वारा सेवाग्राहीलाई गरिने व्यवहार, कार्यमा पारदर्शीता, अभिलेखको सुरक्षालगायतका क्षेत्रमा सीसी क्यामेराबाट निगरानी बढाइएको छ । ‘कार्यालयको १५ वटै कोठामा सीसी क्यामेरा जडान गरिएको छ,’ उनले भने, ‘सीसी क्यामेरा जडान पश्चात लेखापढी कानून व्यवसायीलाई कार्यालयको फाँटमा पस्न रोक लगाइएको छ ।’
कार्यालयले महिला, दलित, जनजाति, शहीद, अपाङ्गता र कृषि फार्मको लागि रजिष्ट्रेशन पास गर्दा २५ प्रतिशत राजश्वमा छुटको व्यवस्था गरेको छ । प्रायः दैनिक भीडभाड हुने यो कार्यालयमा कोभिड– १९ का कारण पछिल्लो समय सुनसान जस्तै देखिएको थियो । अहिले पुनः सेवाग्राहीको संख्या बढ्दै गएको कार्यालयले जनाएको छ ।
कार्यालयले आव ०७५/७६ मा २८ करोड ५८ लाख ६९ हजार १९९ र आर्थिक वर्ष ०७६/७७ मा २४ करोड ४६ लाख ४८ हजार ८४ राजस्व संकलन गरेको जनाएको छ ।
लकडाउनका कारण करिब तीन महिना कार्यालय बन्द नै गर्नुपरेकाले यस आवमा राजस्व संकलनमा अझै कमी आउनसक्ने अनुमान गरिएको कार्यालय प्रमुख भण्डारीले बताए ।
