१६ असार २०८३, मंगलबार
कपिलवस्तुको वाणगङ्गा नगरपालिकाको कोइली खोलाले बगाएको जीप बिहीवार भेटिए पनि त्यसमा सवार २ जना अझै भेटिएका छैनन् ।
कोइली खोलामा आएको बाढीले बुधवार नेपाल विद्युत् प्राधिकरणको बा१ञ नम्बरको जीप बगाउँदा ३५ वर्षीय चालक माधव पाण्डेको शव फेला परेको जिल्ला प्रहरी कार्यालय कपिलवस्तुका प्रहरी उपरीक्षक नवराज अधिकारीले बताए । उनका अनुसार जीपमा सवार ६ जनामध्ये ३ जना हामफालेर बच्न सफल भएका थिए भने २ जना बेपत्ता भएका थिए ।
वाणगङ्गाको भलवाड पडेरीयामा विद्युत् मर्मतको काम सकेर कार्यालय फर्कने क्रममा जीपलाई खोलाले बगाउँदा त्यसमा सवार प्राधिकरणका फ्युज सेवा गजेहडाका प्रमुख कृष्णप्रसाद पौडेल र अर्घाखाँची शितगङ्गा नगरपालिका–१३ का केशव भाट क्षेत्री हालसम्म फेला पर्न नसकेको प्रहरी उपरीक्षक अधिकारीले बताए ।
उनका अनुसार नेपाली सेना, नेपाल प्रहरी र सशस्त्र प्रहरीले खोलाको आसपासका क्षेत्रबाट दुवै जनाको खोजी कार्य जारी राखेको छ । बुधवारदेखि नै ३ वटै सुरक्षा निकायको टोली खोजी कार्यमा परिचालन भएको छ । बुधवार नभेटिएपछि सो टोलीले बिहीवार बिहानैदेखि बेपत्ता दुवै जनाको खोजी कार्य गरिरहेकोे प्रहरी उपरीक्षक अधिकारीले जानकारी दिए ।
