उत्तर कोरियाका कारागारमा कैदीहरूलाई अन्य मृत कैदी डढेपछिको खरानी मिसिएको पानी पिउन बाध्य बनाइएको खुलासा गरिएको छ । 

उनीहरूले विदेशी टीभी सिरीज हेरेको आरोपमा सजाय दिइएको हो । 
 

चोंगोरी श्रम शिविरमा कहालीलाग्दो समय बिताएका पूर्व कैदीहरूले उक्त कुरा बताएका हुन् । 

उक्त शिविरमा उत्तर कोरियालीहरूलाई दक्षिण कोरियाली टीभी सिरीज हेरेको वा क्रिस्चियन धर्म अपनाएको आरोपमा कैद गर्ने गरिएको छ । 

एक पूर्व कैदीले बताए, ‘प्रत्येक सोमवार हामी लाश डढाउँथ्यौं । एउटा घर जस्तो देखिने ठाउँ छ । त्यहाँ हामी गोलो ट्यांकीमा लाशहरू खातका खात राख्थ्यौं ।’

‘त्यस ठाउँमा रगतको गन्ध अनि कुहिएको वा डढिरहेको लाशको गन्ध आउँथ्यो,’ उनले भने ।

लाश डढाएपछि खरानीलाई डढाउने ठाउँ नजिकै राखिन्छ । खरानीहरू कम्पोस्ट मलका रूपमा उपयोग गरिन्छ । 

‘पानी परेपछि खरानी बगेर नदीमा पुग्थ्यो र कैदीहरू त्यही नदीको पानी पिउँथे अनि नुहाउन पनि त्यही पानी प्रयोग गर्थे ।’

अनि पानी परेको बेलामा दाउरा भिजेर लाश राम्ररी नडढ्ने पनि उनले बताए । 

ती कैदीले बताएका यी कुराहरू कमिटी फर ह्युमन राइट्स इन नर्थ कोरियाले प्रकाशन गरेको एक प्रतिवेदनमा उल्लेख गरिएको छ । 

प्रतिवेदनमा मृत कैदीहरूको शरीर डढाउनुअघि एउटा भण्डारकक्षमा राख्ने गरिएको खुलासा गरिएको छ । त्यहाँ ती लाशलाई मुसाले खाने र लाश कुहिने गरेको छ ।

उक्त संस्थाले भूउपग्रहीय तस्वीर उपयोग गरेर लाश डढाउने ठाउँ, कारागार भवन र जबर्जस्ती श्रम गर्न लगाइने ठाउँको लोकेसन उजागर गरेको छ । 

तीमध्ये एक ठाउँ तामाखानी हो । त्यसले नदीको पानीलाई थप प्रदूषित पारिरहेको र कैदीहरूले त्यही पानी पिउनु परेको विश्वास गरिएको छ । 

उक्त प्रतिवेदनका प्रमुख लेखक जोसेफ एस बर्मुडेजले बताए, ‘मानिसहरूले कल्पनातीत रूपमा दुःख भोगिरहेको हामीलाई थाहा छ ।’