थाइल्यान्डमा राजतन्त्रविरोधी प्रदर्शन चर्कंदै गएपछि राजधानी बैंककमा कठोर संकटकालको घोषणा प्रधानमन्त्रीले गरेका छन् । 

प्रहरीले २० जनाभन्दा बढीलाई पक्राउ समेत गरिसकेको छ । 

संकटकालको नियमअनुसार, पाँच वा त्यसभन्दा बढी व्यक्तिहरू भेला हुन प्रतिबन्ध लगाइएको छ । अनि डर उत्पन्न गर्ने वा राष्ट्रिय सुरक्षालाई असर पार्ने समाचार वा अन्लाइन सूचना प्रकाशन गर्ने काममा पनि रोक लगाइएको छ । 
बुधवार एक विशाल जुलूसमा प्रदर्शनकारीहरूले लोकतान्त्रिक सुधार ल्याउनुपर्ने र शक्तिशाली राजतन्त्र पनि सुध्रिनुपर्ने माग राखेका थिए । 

बिहीवार बिहान सबेरै दंगा प्रहरीले गभर्नमेन्ट हाउसअगाडि प्रदर्शन गरिरहेकाहरूलाई तितरबितर पारेको थियो । उनीहरू प्रधानमन्त्री प्रयुत चान–ओचाको राजीनामा माग्दै प्रदर्शन गरिरहेका थिए ।

कोरोनाभाइरस नियन्त्रणका लागि घोषणा गरिएको संकटकाल थाइल्यान्डमा अझै पनि कायम छ । प्रदर्शनहरू चर्किरहेको र बुधवार राजाको मोटरकेडलाई बाधा गरिएको अवस्थालाई व्यवस्थापन गर्न नयाँ शक्ति प्रयोग गरिएको सरकारको भनाइ छ । अनि आर्थिक क्षति र कोरोना फैलिने डरलाई पनि सरकारले उद्धृत गरेको छ । 
 

मानवअधिकारवादी संगठन ह्युमन राइट्स वाचका अनुसार, नयाँ संकटकालीन उपायहरूले प्रदर्शनकारीलाई ३० दिनसम्म वकिल वा परिवारको पहुँचविना नै अनि अभियोग नलगाइकनै हिरासतमा राख्न प्रहरीलाई अधिकार दिएको छ ।