जिल्ला प्रशासन कार्यालय धनुषाले भीडभाड नगरी स्वास्थ्य र सुरक्षाका मापदण्ड पालना गर्न तथा भौतिक दूरी कायम गरी छठ पर्व मनाउन सम्बन्धित सबैमा आग्रह गरेको छ ।

कोरोना भाइरस संक्रमणको जोखिमलाई दृष्टिगत गरी जिल्ला संकट व्यवस्थापन समिति र सुरक्षा समितिको बैठकको निर्णयानुसार सो आग्रह गरिएको धनुषाका प्रमुख जिल्ला अधिकारी प्रेमप्रसाद भट्टराईले जानकारी दिए । उनका अनुसार समितिले संक्रमणको विद्यमान स्थितिमा तिहार, छठजस्ता पर्वमा देउसी भैलो तथा जुवा/तास नखेल्न समेत सबैमा आग्रह गरिएको छ ।

खोला नदी तथा पोखरीहरू भित्र नपसी छठ पर्व मनाउन बैठकबाट निर्णय गरिएको बताइएको छ । समितिद्वारा सो विपरीत गरे गराए व्यक्ति विशेषदेखि राजनीतिक, धार्मिक तथा सामाजिक संघ/संस्थाका पदाधिकारीलाई संक्रामक रोग ऐन–२०२० बमोजिम कारवाही गरिने पनि निर्णय गरिएको छ ।