पार्टीभित्र देखिएको विवाद उत्कर्षमा पुगेको समयमा सरकारको नेतृत्व गरिरहेको नेपाल कम्युनिस्ट पार्टी (नेकपा)को सचिवालय बैठक शुरू भएको छ । प्रधानमन्त्री निवास बालुवाटारमा शुक्रवार अपराह्न शुरू बैठकमा सचिवालयका सबै ९ जना सदस्य उपस्थित छन् । 

कार्यकारी अध्यक्ष पुष्पकमल दाहाल प्रचण्ड लगायतका सचिवालयका बहुमत सदस्यले बैठक बोलाउन आग्रह गर्दै लिखित निवेदन दिएको ६ दिनपछि सचिवालय बैठक बसेको हो ।

पार्टीभित्रको विवाद समाधान र मुलुकका अगाडि देखापरेका समस्या समाधानका लागि छलफल गर्न भन्दै प्रचण्डसहितका सचिवालयका ५ जना नेताले शनिवार तत्काल सचिवालय बैठक बोलाउन प्रधानमन्त्री एवं नेकपा अध्यक्ष केपी ओलीसँग लिखित आग्रह गरेका छन् । 

अध्यक्ष प्रचण्ड, वरिष्ठ नेताद्वय माधव नेपाल र झलनाथ खनाल, उपाध्यक्ष वामदेव गौतम र प्रवक्ता नारायणकाजी श्रेष्ठ लगायतले बैठक माग गरेका थिए । 

मन्त्रिपरिषद् विस्तार, राजदूतको सिफारिश लगायतका घटनापछि नेकपाभित्रको विवाद फेरि उत्कर्षमा पुगेको छ । शुक्रवारको बैठक दुवै अध्यक्षसँगको परामर्शमा महासचिव विष्णु पौडेलले बोलाएका हुन् । औपचारिक बैठक नबोलाए आफूले कार्यकारी अधिकार प्रयोग गरेर बैठक बोलाउने चेतावनी प्रचण्डले दिएका थिए । 

त्यसरी बैठक बोलाए पार्टी विभाजनको बिन्दु हुने भन्दै ओलीले चेतावनी दिएका थिए । सचिवालय बैठकको पूर्वसन्ध्यामा ओलीले पार्टीभित्र गुटबन्दी गरेको आरोप प्रचण्डमाथि लगाएका छन् ।