कोरोना भाइरस (कोभिड–१९) संक्रमणबाट हालसम्म संघीय सरकारका ५ जना मन्त्री प्रभावित भएका छन् ।

स्वास्थ्य तथा जनसंख्यामन्त्री भानुभक्त ढकालका अनुसार १ प्रदेश प्रमुख र २ प्रदेश मुख्यमन्त्रीले पनि कोरोनाको संक्रमणलाई जितेका छन् ।

कोभिड–१९ बाट हालसम्म ३० जनाभन्दा बढी संघीय सांसद तथा केही प्रदेशमन्त्री, प्रदेशसभा सदस्य, नगर तथा गाउँपालिकाका प्रमुख सहितका जनप्रतिनिधि पनि कोरोनाबाट प्रभावित भइसकेका छन् । संवैधानिक अंगका पदाधिकारी मात्र होइन, नेपाल सरकारका मुख्यसचिव समेतले कोभिड–१९ को संक्रमणको जोखिम व्यहोरिसकेका छन् ।

नेपाली सेनामा उपरथि र प्रहरीमा प्रहरी नायब महानिरीक्षकसम्म संक्रमित भइसकेका छन् ।

संक्रमितमध्ये ८० प्रतिशतभन्दा बढीलाई रोगको लक्षण नदेखिने चिकित्सको भनाइ छ । संक्रमितमध्ये १५ प्रतिशतमा केही कडा लक्षण देखिने गरेको छ भने ५ प्रतिशतले आईसीयू तथा भेन्टिलेटर प्रयोग गर्नपर्ने हुनसक्ने अनुमान गरिएको छ । 

कोभिड–१९ का बिरामीलाई अस्पतालको शय्यामा राख्नुपरेमा प्रतिव्यक्ति १५ हजार रुपैयाँ, सघन उपचार कक्ष (आईसीयू)मा भर्ना गर्नुपरेमा ७ हजार तथा आईसीयूमा भेन्टिलेटर सहितको सेवा दिन परेमा प्रतिदिन प्रतिव्यक्ति १५ हजार रुपैयाँका दरले उपचारको सम्पूर्ण जिम्मेवारी सरकारले लिएको छ ।

तुलनात्मकरूपमा गर्मीको तुलनामा चिसो मौसममा कोभिड–१९ को संक्रमण बढ्छ भन्ने केहीमा मनोविज्ञान रहे पनि त्यो सही नभएको मन्त्रालयका प्रवक्ता डा. जागेश्वर गौतमले बताए ।

अहिले देखिरहेको प्रभावका आधारमा आगामी ४ महिनामा बढीमा १ लाख ४५ हजार व्यक्ति थप संक्रमण हुनसक्छन् भन्ने अनुमान गरी सुझबुझका साथ तयारीलाई व्यवस्थित गरिएको मन्त्रालयले जनाएको छ ।

मन्त्री ढकालले भने, ‘कुनै राजनीतिक दल, लिंग, जाति, तहतप्का, भूगोल र समुदाय विशेष भनेर नछुट्याउने साझा शत्रुका रूपमा रहेकाले कोरोनाविरुद्ध साझा मोर्चा निर्माण गरी यसमाथि विजय प्राप्त गर्नु आजको आवश्यकता हो ।’