२६ जेठ २०८३, मंगलबार
नेपाली राइड सेयर बजारमा विभिन्न अद्भुत सुविधाका साथ ‘एटेन्ड’ एपले आफ्नो सेवाको सुरुवात गरेको छ । हाल बजारमा उपलब्ध अरु राइड सेयर एपभन्दा धेरै नै उत्साहजनक र आकर्षक सुविधाका साथ आएको यस एपले आफ्नो निजी सवारीसाधन नभएका यात्रुहरुको समस्याको हल गर्ने विश्वास लिइएको छ ।
देशभर जहाँकहिँ जान पनि आफ्नो प्रयोजनमा आउन सक्ने भएकाले यस राइड सेयर एप चाँडै नै यात्रुमाझ जान पहिचान हुने आँकलन गरिएको छ । एप सार्वजनिक एटेन्ड प्रा.लि.का निर्देशक भिमकान्त भण्डारीले भने, ‘यो अहिले नेपालमा चलिरहेको सामान्य राइड सेयरभन्दा भिन्न रहेको छ । मोडल त हाम्रो पनि राइड सेयर नै हो तर हाम्रो सेवा र सुविधा अरूभन्दा भिन्न छ । हामीले मोटरसाइकल, एम्बुलेन्स, शववहान, ट्याक्सी, कार, जिप, मालबाहक ट्रकदेखि हेलिकप्टर सम्मको सेवा दिन्छौं, साथै यसमा हेल्थ सर्भिस अन्तर्गत घरमै औषधि पुर्याउने, डक्टर नर्स पठाउने र विभिन्न ल्याव समन्धी सम्पूर्ण कार्यकालागि ल्याव टेक्निसियन घरमै पठाउने काम पनि गर्ने छौँ ।
यसैगरी कम्पनीले प्याकेज सुविधाको अवधारणालाई समेत अघि सारेको छ, जसमा अग्रिम बुकिङ सेवाका साथै चालकसहित वा चालकबिनाको गाडी लिन र इन्धन सहित वा आफैंले इन्धन हाल्न पाउने विकल्प समेत राखेको छ । साथै दुर्घटनाको जोखिमलाई मध्यनजर गर्दै र हाल चलिरहेको बीमा सम्बन्धी विषय सम्बोधन गर्न, कम्पनीसँग आवद्ध सम्पूर्ण गाडी तथा मोटरसाइकलमा यात्रारत चालक र यात्रुको तेश्रो पक्षीय बीमा समेत गरिने भण्डारीले बताए ।
त्यस्तै सेवाको उपयोग गरे पश्चात यात्रुलाई पैसा तिर्न सजिलो होस् भन्ने उद्देश्यले कम्पनीले नगद बाहेक जुनसुकै बैंकको एटिएमबाट पनि पैसा तिर्न मिल्ने प्रणाली विकास गरिएको छ भने राइडरबाट कम्पनीले सेवा उपलब्ध गराए वापत १० प्रतिशत कमिसन लिने छ । हाल बजारमा चलिरहेको राईड सेयरको तुलनामा यो कमिसन न्यून रहेको छ । एम्बुलेन्स र शव वहानबाट भने कुनै कमिसन नलिने कम्पनीले जनाएको छ ।
सुरक्षाको दृष्टिकोणले समेत यो एप विश्वासिलो रहेको छ र यसमा रहेको इमर्जेन्सी बटन दबाएमा नम्बर सेट गरिएको आफन्तको मोबाइलमा म्यासेज र प्रहरीलाई समेत फोन जाने सुविधा रहेको छ । सुरुवाती अवस्थामा रहेता पनि हाल कम्पनीमा करिब ५ सय गाडी आवद्ध भइसकेका छन् भने ट्याक्सी र बाइकलाई क्रमशः आबद्ध गराउँदै लैजाने कम्पनीको योजना रहेको छ । साथै बाहिर गएर खोजी खोजी बुक गर्न भन्दा आफ्नै मोबाइल एपबाट एक क्लिकको भरमा बुक गर्न मिल्ने यस एप आर्थिक दृष्टिकोणले समेत लाभदायी रहेको कम्पनीले दावी गरेको छ ।
यो एप एन्ड्रोइड प्रयोगकर्ताले प्ले स्टोर र आइफोन प्रयोगकर्ताले आईओएसमा गएर सजिलै आफ्नो मोबाइलमा इन्स्टल गर्न सक्नेछन् ।
