सरकारले गत कात्तिक ८ गतेदेखि नेपालमा सञ्चालित विदेशी टेलिभिजन च्यानल पूर्णरुपमा विज्ञापनरहित (क्लिन फिड) लागू भएपछि रोकिएका च्यानल पुनः सञ्चालनमा आएका छन् ।

विदेशी टेलिभिजन च्यानल विज्ञापनरहित भएको करीब २ महिनापछि डिसहोम मिडिया प्रालिबाट प्रसारण हुने स्टार नेटवर्क अन्तर्गतका ३२ वटा च्यानल मंगलवारबाट पुनः सञ्चालनमा आएका हुन् । 

विदेशी ब्रोडकास्टरले तत्काल विज्ञापनरहित च्यानलहरू उपलब्ध गराउन नसकेका कारण प्रसारण अवरुद्ध भएका च्यानलहरू पुनः विज्ञापनरहित प्रसारणमा आएको डिशहोम मिडिया प्रालिले जनाएको छ ।

डिशहोम मिडिया प्रालिका प्रबन्ध निर्देशक सुदीप आचार्यका अनुुसार स्टार नेटवर्कअन्तर्गत स्टार प्लस, स्टार गोल्ड, स्टार भारत, स्टार मुभिज, स्टार गोल्ड, स्टार गोल्ड टु, स्टार गोल्ड सेलेक्ट, स्टार प्लस एसडी, स्टार उत्सभ मुभिजलगायत च्यानल विज्ञापनरहित प्रसारणमा आएका छन् । 

उनका अनुसार विदेशी ब्रोडकास्टले तत्काल विज्ञापनरहित च्यानलहरू उपलब्ध गराउन नसक्दा तथा आएका उपकरण समेत करीब १ महिनाभन्दा बढी भन्सार कार्यालयमा रोकिँदा च्यानल पुनः सञ्चालनमा आउन समय लागेको हो ।