गृहमन्त्री एवं नेकपा सचिवालय सदस्य रामबहादुर थापाले प्रतिनिधि सभा पुनर्गठन हुन्छ भन्नु पश्चगामी सोच र स्यालहुइयाँ मात्र भएको टिप्पणी गरेका छन् । उनले संसद् विघटन अग्रगामी र क्रान्तिकारी कदम भएको दाबी गरे । 

प्रधानमन्त्री एवं नेकपा अध्यक्ष केपी शर्मा ओली पक्षीय केन्द्रीय सदस्यहरूको बैठकलाई बिहीवार बालुवाटारमा सम्बोधन गर्दै गृहमन्त्री थापाले निर्वाचन नै अग्रगामी कदम भएको बताएका हुन् । 

‘विघटित प्रतिनिधि सभा पुनःस्थापना हुन्छ भन्नु पश्चगामी र स्यालहुइयाँ मात्र हो । निर्वाचन हुनु अग्रगमन हो, हामीले निर्वाचनबाट दुईतिहाइ बहुमत ल्याउनुपर्छ,’ राष्ट्रिय सभा सदस्य समेत रहेका थापाले भने । 

पार्टीमा गुटबन्दी र अराजकता पुष्पकमल दाहाल प्रचण्ड र माधवकुमार नेपालहरूले जन्माएको दाबी थापाले गरे ।

उनले आफूले सोचविचार गरेरै नेकपाको मूल नेतृत्वलाई साथ दिएको उनले बताए । साथै नेकपाको मूल नेतृत्व केपी ओली नै भएको थापाले बताए । 

लामो समयको मौनता तोड्दै थापा ओली क्याम्पमा गएका हुन् । 

ओली समूहमा सहभागी हुने थापा पूर्वमाओवादी खेमाका प्रभावशाली नेता हुन् ।